Almatyda táýlik boıy jumys isteıtin kitaphanalar jelisin keńeıtý jumystary Memleket basshysy Qasym-Jomart Toqaevtyń Almatyny «uıyqtamaıtyn» megapolıske aınaldyrý jónindegi tapsyrmasy aıasynda jalǵasyp jatyr. Aqpan aıynan bastap taǵy eki qalalyq kitaphana – Áýezov aýdanyndaǵy Qazaqstan jazýshylary kitaphanasy jáne Bostandyq aýdanyndaǵy Almaty Kitaphanalarynyń fılıaly 24/7 rejıminde qyzmet kórsetedi, dep habarlaıdy Egemen.kz.
Buǵan deıin qalada úsh kitaphana táýlik boıy jumys isteý tártibine kóshken bolatyn. Olar Jambyl atyndaǵy qalalyq jasóspirimder kitaphanasy, Alatau Creative Hub ortalyǵy jáne Muhtar Áýezov atyndaǵy kitaphana. Osylaısha, Almatydaǵy táýlik boıy jumys isteıtin kitaphanalar sany beseý boldy.
Qoǵamdyq kóliktegi «kitaphana»
Almaty qalasynyń 11-shaǵynaýdanynda, Altynsarın dańǵyly boıyndaǵy №37 úıde ornalasqan Qazaqstan jazýshylary kitaphanasy 1962 jyly ashylǵan jáne Áýezov aýdanyndaǵy jetekshi zııatkerlik ortalyqtardyń biri sanalady. 2020 jyly júrgizilgen jańǵyrtý jumystarynan keıin kitaphana keńistigi zamanaýı ári kelýshilerge qolaıly formatta qaıta jabdyqtaldy. Kitaphananyń jalpy aýmaǵy 410 sharshy metr, kitap qory 40 myńnan asady, al jyl saıynǵy kelýshiler sany 145 myń adam. Munda erekshe qajettilikteri bar azamattarǵa arnalǵan arnaıy jumys oryndary qarastyrylǵan, elektrondy oqý zaly jumys isteıdi, RFID radıojıilikti sáıkestendirý júıesi engizilgen jáne «Almaty-library» kitaphanalyq-aqparattyq júıesi qoljetimdi.
Kitaphanalar táýlik boıy jumys isteıdi
Kitaphanalardyń táýlik boıy jumys isteý rejımine kóshýi qalanyń taǵy eki aýdan turǵyndaryna kitaphana qyzmetin ózderine yńǵaıly ýaqytta, sonyń ishinde keshki jáne túngi mezgilde paıdalanýǵa jol ashty. Bul óz kezeginde bilim alý, ózin-ózi damytý jáne mádenı demalys úshin qosymsha jaǵdaı jasaıdy.
Almatyda Braıl qarpi bar, IT-aımaqty kitaphana ashyldy
Aıta keteıik, búginde Almaty qalasynda 30 qalalyq kitaphana jumys isteıdi. Táýlik boıy qyzmet kórsetý tájirıbesin keńeıtý – kitaphana jelisin jańǵyrtý men megapolıstiń mádenı ortasyn damytýǵa baǵyttalǵan keshendi baǵdarlamanyń bir bóligi.