Qazaqstannyń Ortalyq saılaý komıssııasy tóraǵasynyń orynbasary Muhtar Erman Varshavada ótken EQYU DIAQB-nyń joǵary deńgeıdegi forýmyna qatysty. Álemniń 33 elinen, sondaı-aq AQSh pen Kanadadan delegattar jınalǵan bul jıynda Qazaqstannyń saıası reformalary men jańa Konstıtýsııa jobasy keńinen tanystyryldy, dep jazady Egemen.kz.
Issapar barysynda Muhtar Erman EQYU DIAQB dırektory Marııa Telalıanmen kezdesti. OSK ókili Qazaqstan Prezıdenti Qasym-Jomart Toqaevtyń bastamasymen júzege asyp jatqan konstıtýsııalyq reformanyń negizgi baǵyttaryn baıandady. Suhbat barysynda mynadaı mańyzdy ózgeristerge erekshe nazar aýdaryldy:
Bir palataly Quryltaıdyń qurylýy, onyń depýtattarynyń partııalyq tizimder boıynsha saılanýy;
Vıse-prezıdent laýazymynyń engizilýi;
Zań shyǵarý bastamasyna ıe Halyq keńesiniń qurylýy.
Marııa Telalıan usynylǵan aqparatqa joǵary baǵa berip, EQYU DIAQB aldaǵy jalpyulttyq referendýmǵa baıqaýshylar mıssııasyn jiberý máselesin talqylaýǵa daıyn ekenin málimdedi.
Kezdesý sońynda Marııa Telalıanǵa QR Ortalyq saılaý komıssııasynyń bastamasymen saılaý taqyrybynda jaryq kórgen kitaptyń aǵylshyn tilindegi nusqasy syıǵa tartyldy.
Muhtar Erman Polshanyń Ulttyq saılaý bıýrosynyń basshysy Pafal Tkachpen de kezdesý ótkizdi. Taraptar saılaý júıesin sıfrlandyrý, kıberqaýipsizdikti qamtamasyz etý jáne saılaýshylardyń jeke derekterin qorǵaý máselelerin talqylady.
Polshalyq áriptester qazirgi tańda óz elinde daýystardy qolmen esepteý ádisi saqtalǵanyn aıtyp, jalǵan aqparatpen (feık) kúresýdiń mańyzdylyǵyna toqtaldy. Kezdesý sońynda Muhtar Erman polshalyq áriptesterin Qazaqstanda ótetin referendýmdy baqylaýǵa aldyn ala shaqyrdy.