Tabany terimen qaptalǵan jalpaq shańǵy sál erterekte árkimniń shatyrynda jatatyn. Ásirese ańshylar qalyń qarda tabanǵa ile sala taýǵa attanar edi. Osy joly kóneniń kózindeı shańǵyny Arshatynyń ormanshylarynan kórdik.
Qulynnyń baltyr terisimen qaptalatyn aıý shańǵyny qazaqtyń ańshylary men malshylary tym-tym erteden paıdalanyp keledi. Yńǵaılysy sol, tabany terimen qaptalǵandyqtan, artqa qaraı syrǵymaıdy. Al keri qaıtqanda, eńiske qaraı zýlap otyrady. Orman-toǵaıdyń arasynda buryp úlgerseńiz bolǵany. Qyry bolmaǵandyqtan, qoldaǵy jalǵyz taıaq súıenish te, tejegish te.
At omyraýlap jara almaıtyn qardyń betimen júretin birden bir kólik – osy aıý shańǵy. Bórisyrǵaqtyń aldy burqasyndatyp neshe kún turǵan. Aýyldan ári Taýtekelige qaraı at ombylap júre almaı qalǵan soń, ormanshylar eriksiz aıaqqa aıý shańǵy baılaǵan. Mundaıda eń aldyna shymyr jigitterdi qoıady eken. Iz túspegen qar betine shańǵymen jol salý – qıynnyń qıyny. Túzý jer bolsa bir sári, órge qaraı ombylaıdy. Sońyń- nan kele jatqandarǵa kedergi bolmaý úshin de aldaryna júırikterin salady. Sóıtip, belgilengen soqpaqtardaǵy fototuzaqty tekseredi, tuıaqtylardyń jem-shóbin qaraıdy.
«Baıaǵyda osy shańǵymen ańshylar táýir-aq júrýshi edi. Qazir kóp kerek qylmaımyz. Áıtpese, qalyń qarda taptyrmaıdy. Jasalýy da asa qıyn emes. Taldan tabanyn jonyp, qulynnyń terisimen qaptaıdy. Ertede atalarymyz shańǵyǵa dep tal kórip ketetin. Reti kelse, qıyp alyp kelip, keptirip qoıatyn. Tabanyndaǵy terisiniń júni bir baǵytqa jyǵylyp jatqan soń daǵy artqa qaraı syrǵanamaıdy», deıdi osy óńirdi bes saýsaǵyndaı biletin ormanshy Manarbek Omarov.
Ormanshylardyń shańǵysyn aıaqqa biz de baılap kórdik. Qalyń qarda iz basý kózge ońaı kóringenimen, ókpeni kúıdirip, aıaqqa edáýir salmaq túsiredi eken. Aıtpaqshy, arshatylyqtar buny aıý shańǵy desedi.
Shyǵys Qazaqstan oblysy,
Katonqaraǵaı aýdany,
Arshaty aýyly