Tórtjyldyqtyń basty dodasynda el namysyn qorǵaıtyn sańlaqtardyń arasyndaǵy eń ataqtysy – Iýlııa Galysheva. Ol – qazirgi ulttyq qurama sapynda Olımpıada júldesine ıe bolǵan jalǵyz sportshy.
Kendi Altaıda týǵan 33 jastaǵy sportshy halyqaralyq arenadaǵy alǵashqy júldesine 2008 jyldyń aqpanynda qol jetkizdi. Germanııanyń Shlırze qalasynda ótken týrnırde kúmis medaldy moınynda jarqyratty. Arada birer kún ótkende Shveısarııanyń Engelberginde mogýl men paralleldi mogýldan top jardy. Jasóspirimder men jastar arasyndaǵy jeńisteri Iýlııany qanattandyrǵany sonsha, eresekter básekesinde de birden kózge tústi. Ulttyq qurama bapkerleri 17 jastaǵy frıstaılshyny Vankýver Olımpıadasyna qosýdy jón kórdi. «Úıeńki japyraqtar elindegi» dodany jerlesimiz 11-orynmen qorytyndylady.
2014 jyly Sochı Olımpıadasyna attanǵanda onyń sheberligi tolyq shyńdalǵan bolatyn. Reseı jerinde otandasymyz tamasha óner kórsetkenimen, tóreshiler ony úzdikter qataryna qospady. Jetinshi oryndy mise tutpaǵan Galysheva men bapkerleri shaǵym túsirgenimen, nátıje ózgermedi. Dese de, alǵan betinen qaıtpaıtyn qaısar qyz tórt jyldan soń degenine jetti. Ońtústik Koreıanyń Phıonchhan Olımpıadasynda qola medal ıelenip, elimizdiń frıstaıl sheberleri tarıhyndaǵy tuńǵysh júldeni elge syılady.
Olımpıadadan bólek, óskemendik sportshy – álem chempıony (2019), kúmis (2017, 2021), qola (2021) júldeger. Dúnıejúzilik Ýnıversıadada úsh márte (2015, 2017), Azııa oıyndarynda úsh ret (2011, 2017) top jaryp, bir kúmis (2017) medal enshiledi. Sondaı-aq onyń qorjynynda basqa da iri halyqaralyq týrnırlerdiń júldeleri bar.
Sańlaq sportshynyń endigi maqsaty – Olımpıada oıyndarynda taǵy bir márte atoı salý.