Elimizdiń Jańa Konstıtýsııasy ókiletti bılikti kúsheıtip, azamattardyń senimin arttyrýǵa jáne jetildirilgen parlamenttik mádenıetti qalyptastyrýǵa baǵyttalǵan. Osy turǵydan ony qabyldaý máselesin búkilhalyqtyq referendýmǵa shyǵarý qajet. Mundaı pikirdi Senat Tóraǵasynyń orynbasary Olga Perepechına Konstıtýsııalyq komıssııanyń otyrysynda aıtty, dep habarlaıdy Egemen.kz.
Olga Perepechınanyń sózinshe, Jańa Konstıtýsııa jobasy – mańyzdy ári jaýapty jumystyń jemisi jáne qoǵamnyń zamanaýı qajettilikterin eskere otyryp, memlekettik qurylymdy jańartýǵa baǵyttalǵan.
«Jańa Konstıtýsııa bıliktiń turaqty ári túsinikti úlgisin qalyptastyryp, ókiletti ınstıtýttardyń rólin nyǵaıtady jáne memleket pen azamattar arasyndaǵy ózara qatynastyń naqty erejelerin belgileıdi. Barlyq ózgeristerdiń basty maqsaty – adam, onyń quqyqtary, qadir-qasıeti men bolashaqqa degen senimin qorǵaý», dedi Senat Tóraǵasynyń orynbasary.
Sonymen qatar ol Parlament rólin Quryltaı ınstıtýty arqyly qaıta qaraý negizgi sheshimderdiń biri ekenin atap ótti.
Máselen, Quryltaı eki palatanyń izbasary jáne joǵary ókildi organnyń jańa ataýy. Bul onyń memlekettik bılik júıesindegi erekshe mańyzyn, tarıhı dástúrmen baılanysyn jáne halyq aldyndaǵy jaýapkershiligin kórsetedi.
«Másele ınstıtýttyń sımvoldyq jáne saıası mártebesin kúsheıte otyryp, onyń parlamenttik tabıǵatyn saqtaý týraly bolyp otyr», dedi Olga Perepechına.
Konstıtýsııa jobasynda Quryltaıdyń ishki uıymdastyrylýyna, onyń ishinde komıtetteri men komıssııalarynyń qyzmetine de erekshe nazar aýdaryldy. Senat Tóraǵasy orynbasarynyń pikirinshe, olardyń jumys isteý negizderin Konstıtýsııalyq deńgeıge shyǵarý parlamenttik júıeni nyǵaıtýǵa mańyzdy qadam bolady.
«Komıtetter men komıssııalar zańdardy daıyndaý men pysyqtaýda, saraptamalyq qorytyndylar men parlamenttik baqylaýdy qalyptastyrýda mańyzdy ról atqarady. Olardyń mártebesi, ókilettikteri men jumys qaǵıdattaryn naqty Konstıtýsııalyq deńgeıde retteý zańnamalyq prosestiń sapasyn arttyryp, ony barynsha ashyq jáne boljamdy etedi», dedi Olga Perepechına.
Ádil eńbek, qaýipsiz jumys, laıyqty jalaqy: Maksım Rojın jańa Konstıtýsııanyń mańyzdy tusyn atady
Ol turaqty komıtetterdiń salalyq qaǵıdat boıynsha qurylatynyn jáne óz salasyna sáıkes mamandandyrylǵan talqylaýlardy jınaqtaıtynyn eske saldy. Osy mehanızm sheńberinde qabyldanǵan barlyq zań jobalary jan-jaqty talqylanady. Komıssııalar belgili bir máseleler boıynsha shoǵyrlandyrylǵan sheshim qabyldaýǵa múmkindik beretin qural qyzmetin atqarady.
«Jańa Konstıtýsııa jobasy ókiletti bılikti kúsheıtýge, azamattardyń senimin arttyrýǵa jáne jetildirilgen parlamenttik mádenıetti qalyptastyrýǵa baǵyttalǵan. Bizdiń azamattarymyzdyń jobaǵa degen belsendi qyzyǵýshylyǵyn eskere otyryp, Konstıtýsııany qabyldaý máselesin búkilhalyqtyq referendýmǵa shyǵarý usynysyna qoldaý bildirgim keledi», dedi Olga Perepechına.
Senat Tóraǵasy orynbasarynyń aıtýynsha, bul rásim halyqtyq egemendik qaǵıdatyna sáıkes keledi jáne qabyldanatyn sheshimniń erekshe mańyzdylyǵyn kórsetedi.
«Atalmysh jobany qoldaı otyryp, biz ony júzege asyrýǵa jáne elimizdiń parlamenttik júıesin odan ári damytýǵa jaýapkershilik alýǵa daıyn ekendigimizdi dáleldeımiz», dep túıindedi ol.
Aıta keteıik, búgin, 7 aqpanda Qazaqstanda Konstıtýsııalyq reforma jónindegi komıssııanyń kezekti otyrysy ótip jatyr. Otyrys barysynda Jańa Konstıtýsııanyń jobasyna teńgeni ulttyq valıýta retinde bekitetin norma engizilgeni aıtyldy. Sondaı-aq Májilis depýtaty, «Ulttyq volonterlik jeli» ZTB jetekshisi Vera Kım Qazaqstanda Konstıtýsııalyq deńgeıde volonterlikti yntalandyrýdy bekitý qajet degen bastama kóterdi.