Atamekendi ańsap jetip, Rýdnyı qalasynyń mańaıyna qonǵan qandastardyń arasynda ken, temirjol, tehnıka salasynyń qyr-syryn meńgergen maıtalmandar az emes. Solardyń biri – «ERG Service» JShS №2 tehnıkalyq qyzmet kórsetý jáne jóndeý bóliminiń elektr sheberi Ertýǵan Qudabaev. Tájirıbeli mamannyń bir salada taban aýdarmaı eńbek etip kele jatqanyna 35 jyl boldy.
Keıipkerimiz О́zbekstannyń Naýaı oblysynda týyp-ósken. Buharadaǵy aýyl sharýashylyǵy tehnıkýmyn bitirgen soń, 19 jyl boıy Naýaı ken zaýytynda áıgili «BelAZ» kólikteriniń elektr júıesin jóndeýmen aınalysqan.
– Elektr slesari mamandyǵy – tehnıka men tehnologııanyń toǵysqan jeri. Bizdiń mindetimiz tek temir buraý nemese sym jalǵaý emes, ken baıytý kombınatynyń júzdegen tonna taý jynystaryn óńdeıtin, keshendi elektr júıeleri men aýyr tehnıkalardyń jumysyn kidirtpeı, der kezinde aldyn alyp nemese jóndep otyrý, – deıdi Ertýǵan.
2012 jyly tarıhı otanyna oralǵan bilikti Ertýǵan birden Sokolov-Sarybaı ken baıytý óndiristik birlestigine jumysqa ornalasady. Búginde «ERG Service» seriktestiginde energetıkalyq qurylǵylar men «aqyldy» tehnologııa jabdyqtaryn qalypqa keltirip júr. Ámbebap maman ken óndirisinde paıdalanylatyn qýatty qurylǵylardyń qozǵaltqyshtaryn, alyp tehnıkalar men ózge de kenish jabdyqtarynyń elektrlik, mehanıkalyq aqaýyn joıyp, qaıtadan iske qosyp berip otyrady.
– Aýyr tehnıkamen jumys istegen soń qaýipsizdikke qatań qaraımyn. Qazirgi kásiporyndarda qurylǵylar jıi jańarady. Sondyqtan jańa tehnologııalardy, zamanaýı dıagnostıka quraldaryn der kezinde meńgerip otyrý mańyzdy. Biz tehnıka kesheniniń úzdiksiz jumys isteýin qamtamasyz etemiz, – deıdi ol.
Búginde aǵa býyn qataryna ilikken Ertýǵan izbasar tárbıeleýden de jalyqqan emes. Kenish joldarynda júretin aýyr tehnıkanyń elektr júıesin dıagnostıkadan ótkizý, jóndeý tárizdi mańyzdy mindetti atqarý jan-jaqty bilimdi, tııanaqtylyqty, úlken jaýapkershilikti qajet etedi. Sondyqtan seriktestikke endi kelip jatqan jas maman jumysqa ábden tóselip alǵansha Ertýǵannyń qaraýynda bolady.
– Qazir óndiriske jastar kóp kelip jatyr. Elektr júıesinde qatelikke jol joq, kishkentaı aqaýdyń ózi úlken apatqa ákelýi múmkin. Sondyqtan keıingi býynǵa bilmegenin úıretip, baǵyt-baǵdar beremin. Jastar bilimmen qosa, jyldar boıy jınaǵan tájirıbeden keıin keletin bilik degen nárse bar ekenin árdaıym jadynda ustaýy kerek. Tehnıkanyń bári birdeı emes. Árqaısysynyń óz syry, óz qupııasy bar. Shákirtterim qazir ár jerde, taý-ken salasynda eńbek etip júr. Mysaly, Baqdáýlet Sopybekov degen shákirtime elektr syzbalaryn, qurylǵylardy jóndeý ádisterin úırettim. Sonymen qatar júktelgen mindetke asa jaýapkershilikpen qaraýdy, jumysqa kirispes buryn qaýipsizdikke mán berýdi kún saıyn qulaǵyna quıyp otyrdym. Shákirtim úmitimdi aqtady, qazir osy ózim jumys istep jatqan ýchaskeniń bas energetıgi bolyp qyzmet etedi, – deıdi elektrshi.
О́z isiniń naǵyz sheberi E.Qudabaev búkil ujymnyń aldynda abyroıly. Tútini túzý ushqan bir shańyraqtyń arqa súıeri bolyp otyrǵan azamat óz otbasyna, týys-týǵan, aınalasyna da qadirli.
Qostanaı oblysy