Qabıbolla Sydıyqov atyndaǵy Mańǵystaý oblystyq kitaphanasynyń balalar bólimi aı saıyn «Artyq bilim – kitapta» atty saıys ótkizip turady. Bul jolǵy baıqaý 12–13 jastaǵy balalar arasynda uıymdastyryldy. Kishkentaı oqyrmandarǵa Baqtybaı Jaılaýdyń «Ábish Kekilbaıuly kim?» degen kitabyn úıden muqııat oqyp kelip taldaý jáne suraqtarǵa jaýap berý usynyldy.
Úsh kezeńnen turatyn jarysqa aýdandar men qalalardaǵy mektepterden 24 oqýshy qatysty. Olar aldymen ekrannan ózderi tańdaǵan uıashyqtardaǵy suraqtarǵa jaýap berdi. Ekinshi kezeńge 12 qatysýshy iriktelip alyndy. Talap boıynsha olar kitaptaǵy maqal-mátelder men turaqty sóz tirkesteriniń maǵynasyn ashyp, oıyn jetkizdi. Úshinshi kezeńde test tapsyrmalaryn oryndady. Úzdik shyqqan jeti oqýshy júldeli oryndardy bólisti. Bas júldeni Aqtaý qalasy T.Áshimbaev atyndaǵy №11 lıseı mektebiniń oqýshysy Gúlnaz Jetkizgen jeńip aldy. 1 birinshi oryn, 2 ekinshi oryn, 3 úshinshi oryn jáne 4 yntalandyrý syılyǵynyń ıegerine dıplomdar men aqshalaı syılyqtar berildi. Qatysýshylarǵa da alǵyshattar men kitaptar tabystaldy.
Jaqynda jaryq kórgen kitaptyń avtory Baqtybaı Jaılaý: «Ábish atasynyń shyǵarmalary balalar men jastardyń aqyl-oıyn arttyrady, tálim-tárbıe beredi, sanaly azamat bolyp ósýine oń yqpal etedi. Zeıindi, zerek, zerdeli, zııatker, zııaly tulǵa etip qalyptastyrady. Bizdiń bul kitabymyz kishkentaı oqyrmandardy sol Ábish álemine bala jastan qyzyqtyrýdyń amaly» deıdi.
Balalar bóliminiń meńgerýshisi Qaldygúl Jylqybaeva bastaǵan kitaphanashylar, olarǵa osyndaı saıys ótkizýdi usynǵan Mańǵystaý oblystyq Beket Ata meshitiniń bas ımamy Ánýarbek Izimbaıuly, baıqaýǵa demeýshi bolyp qarjylaı júlde taǵaıyndaǵan «Mańǵystaý qajylary» qaýymdastyǵynyń ókilderi kishkentaı oqyrmandar arasyndaǵy jarysty aldaǵy ýaqytta da jalǵastyra beretinin aıtty.
Mańǵystaý oblysy