Italııanyń Mılan jáne Kortıno qalalarynda ótip jatqan HHV qysqy Olımpıada oıyndary bel ortasynan aýdy. Týrnırlik kestede qysqy sport túrlerin sheber meńgergen elder kósh bastap tur. Dese de tórtjyldyqtyń basty básekesiniń márege jetýine 6 kún baryn eskersek, qorytyndy esep qubylýy bek múmkin, dep jazady Egemen.kz.
16 aqpandaǵy medal sanyna kóz júgirtsek, Norvegııa altyn men jalpy júlde esebinde kósh bastap tur. Atalǵan el qorjynynda – 12 altyn, 7 kúmis, 7 qola medal bar.
Jarys qojaıyndary Italııa sportshylary norvegııalyqtardy ókshelep keledi. Básekeni uıymdastyrýshy taraptyń jalpy júlde sany – 22. Onyń ishinde – 8-i altyn, 4-i kúmis, 10-y qola medal.
Úzdik úshtikti jalpy jıynyn 17 medalmen AQSh túıindep tur. Atalǵan el sportshylary búginge deıin 5 altyn, 8 kúmis, 4 qola enshilegen.
Keıingi tórtinshi jáne besinshi oryndarǵa bes altynmen Nıderlandy jáne Shvesııa jaıǵasqan. Shvesııa Nıderlandyǵa 1 kúmis medal aıyrmasy boıynsha jol berip tur.
Búgingi medal esebine saı Qazaqstan jalpykomandalyq rette mánerlep syrǵanaýshy Mıhaıl Shaıdorovtyń tarıhı altyn júldesimen 17-shi orynǵa jaıǵasqan. 32 jyl kútken júldege taǵy medalder qosyla ma? Endigi jerde qaı sportshylardyń jolyna úmitpen qaraýǵa bolatynyn sport sarapshysy Meıram Saparǵalıuly aıtyp berdi.
«Mánerlep syrǵanaýdan qurama kóshbasshysy Mıhaıl Shaıdorovtan halyq bolyp júlde kútkenimiz anyq. Ol óz kezeginde el senimin artyǵymen aqtady. Shaıdorovtan júlde kútýimiz negizsiz bolǵan joq. О́ıtkeni mánerlep syrǵanaýshy osy olımpıadalyq sıklde jarqyn jeńisterimen kózge túsip júrdi. Sol sekildi short-trekshiler Denıs Nıkısha men Abzal Ájiǵalıevke de artar senim mol. Qos sportshy 2025 jylǵy Azııa oıyndarynda 5000 metr estafetasynda altyn enshilese, búgingi jarys kestesinde turǵan 500 metr qashyqtyqta 2024 jáne 2025 jyldardaǵy álem birinshiliginde kúmis júldege qol jetkizdi. Endi short-trekshiler atalǵan jeńistiń kezdeısoq emes ekenin Italııadaǵy Dúbirli dodada dáleldeı túsýi tıis.
1500 metr qashyqtyqta konkımen júgirýden tájirıbeli sportshy Nadejda Morozova da qorjynǵa júlde salýy yqtımal. Ol Italııadaǵy qysqy Olımpıadanyń ózinde 5000 jáne 3000 metr qashyqtyqta úzdik ondyqqa endi. Sondaı-aq 17 aqpan kúni muzǵa shyǵatyn mánerlep syrǵanaýshy Sofıa Samodelkınanyń da júlde sanyn eseleı túsýge qaýqary jetedi», deıdi Meıram Saparǵalıuly.
Sarapshynyń pikirinshe, dúbirli dodalardaǵy tájirıbe men shyńdalýdyń ózi – qomaqty olja. Sondyqtan keı sport túrleri boıynsha osy joly maıtalman sportshylarmen ıyq tirestire synǵa túsý, tájirıbe jınaý mańyzdy. Bul múmkindikti sheber paıdalaný aldaǵy ýaqytta jeńiske jol ashary anyq. Meıram Saparǵalıuly bul rette taý shańǵysy boıynsha el namysyn qorǵap jatqan 20 jasar Aleksandra Skorohodova men shańǵymen tuǵyrdan sekirýshi Ilıa Mızernyhtiń ónerin joǵary baǵalap, bolashaǵynan zor úmit kúttiretinin atap ótti.
«Aleksandra Skorohodova taý shańǵysynyń sýper gıgant baǵdarlamasy boıynsha tabandylyq tanytty. Aýa raıynyń qolaısyzdyǵyna qaramastan máre syzyǵyn kesip ótti. Osy synda 7 Olımpıada chempıony men 1 álem chempıonynyń márege jete almaǵanyn eskersek, Skorohodovanyń tabandylyǵy súısintedi. Mundaı qajyrly minez keleshekte jeńis tuǵyrynan kórinýge de septesedi. Al 19 jastaǵy Ilıa Mızernyh qysqy Olımpıadanyń birinshi irikteýinde tuǵyrdan sekirýden Qazaqstan tarıhynda eń úzdik nátıjeni tirkep úlgerdi. Ol 140,5 metrge sekirip, 137 ball enshiledi. Kórsetkishi kóńil kónshitti. Jas mólsherine qaramastan jahandyq jarysta tosylmaǵan otandasymyzǵa bul básekeler joǵary tájirıbe jınaqtap, aldaǵy Olımpıadalarda júldege qol sozýyna múmkindik beredi», dep atap ótti sarapshy.
Aıta keteıik, Italııa tórinde el namysyn 10 sport túrinen 36 atlet qorǵap jatyr. Árıne, qysqy sport túrleriniń nátıjesine keı tusta aýa raıy men jarys joly áser etip jatady. Sondyqtan endigi jerde jarys jolyna shyǵatyn barlyq otandasymyzdyń júldege talasy bary anyq.