Astanadaǵy №3 Kópsalaly qalalyq balalar aýrýhanasynda qyzylsha dıagnozymen aýrýhanaǵa jatqyzylǵan balalarǵa kezekti tekserý júrgizildi. Tekserý nátıjesinde aýrý juqtyrǵan balalardyń sany artqany anyqtalyp otyr, dep jazady Egemen.kz.
Aýrýhananyń medısınalyq bólim jónindegi dırektor orynbasary Roza О́tegenovanyń aıtýynsha, 2025 jyldyń qazan aıynan bastap elordada qyzylshamen aýyratyn naýqastar sany artqan.
«2025 jyldyń qazan aıynan beri qyzylsha dıagnozymen túsetin naýqastar sany kóbeıdi. Gospıtalızasııanyń eń joǵary kórsetkishi 2025 jyldyń qarasha-jeltoqsan aılarynda tirkeldi. Bıyl qańtardan bastap kórsetkish tómendegenimen, bul dıagnozben balalar áli de túsip jatyr», dedi ol.
Atyraýda júzdegen adamnyń qyzylsha juqtyrǵany habarlandy
Qazir stasıonarda qyzylsha dıagnozymen 50-den astam bala em qabyldap jatyr. Olardyń basym bóligi – bes jasqa deıingi búldirshinder. Sonymen qatar mektep oqýshylary men orta jáne joǵary oqý oryndarynyń stýdentteri de bar.
Eki jasar Asylymnyń anasy Bekzada Ámirjanova aýrý asqynǵanda ǵana ekpeniń mańyzyn túsingenin aıtty.
«Sársenbi kúni qyzymnyń qyzýy kóterildi. Bul qyzylsha bolýy múmkin dep oılaǵan joqpyz. Senbi kúni keshke qaraı denesine qatty bórtpe shyqqan soń jedel járdem shaqyrdyq. Dárigerler qyzylsha ekenin aıtty. Bizdi birden juqpaly aýrýlar bólimine jatqyzdy. Sol jerde qyzylshaǵa qarsy ekpe alǵan-almaǵanymyzdy surady. О́kinishke qaraı, qyzyma da, tórt jasar ulyma da ekpe saldyrǵan joqpyz. Aýrýhanaǵa túskennen keıin balalaryma ekpe saldyrmaǵanyma qatty ókindim», deıdi ol.
Dáriger Roza О́tegenova vaksına qyzylsha ınfeksııasynyń aldyn alýǵa edáýir kómektesetinin aıtty.
«Bala ekpe almaǵan bolsa, ınfeksııa – óte juqpaly. Qyzylsha asqynǵanda bronhıt, ártúrli deńgeıdegi pnevmonııa, basqa aǵzalardyń zaqymdanýy bolýy múmkin. Ásirese ortalyq júıke júıesine keri áser etýi múmkin», dep túsindirdi Roza О́tegenova.
Elimizde qyzylshaǵa qarsy vaksınasııa naýqany toqtady ma?
Onyń aıtýynsha, qyzylsha aýa-tamshy jolymen taraıdy jáne naýqaspen baılanys kezinde juqtyrý yqtımaldyǵy óte joǵary. Mamannyń sózinshe, qyzylshaǵa qarsy alǵashqy ekpe balalarǵa bir jasynda salynady. Bul – qyzylsha, qyzamyq jáne parotıtke qarsy biriktirilgen vaksına. Qazirgi epıdemıologııalyq jaǵdaıǵa baılanysty bas memlekettik sanıtarııalyq dárigerdiń alty aıdan bastap balalardy qosymsha ımmýndaý týraly qaýlysy kúshine engen.
«О́kinishke qaraı, mundaı erte jasta vaksına alǵandardyń úlesi áli de tómen. Bul ata-analardyń bala densaýlyǵyna degen jaýapkershiligin arttyrý qajet ekenin kórsetedi», dedi dáriger.
Aıda Balaeva qyzylshaǵa qatysty epıdemıologııalyq ahýaldy erekshe baqylaýǵa alýdy tapsyrdy
Aýrýhana mamandary ata-analardy vaksınasııany keıinge qaldyrmaı, balalardy qaýipti ınfeksııalardan ýaqytyly qorǵaýǵa shaqyryp otyr.