Elimizdiń óńdeý ónerkásibinde keıingi jyldary qarqyn ala bastaǵan salanyń biri – jıhaz óndirisi. Byltyrǵy qorytyndy mundaǵy ósimniń kezdeısoq emes ekenin kórsetip otyr. Otandyq kásiporyndar óndiris kólemin aıtarlyqtaı ulǵaıtyp, ishki naryqtaǵy úlesin de, eksporttaý aıasyn da keńeıtti.
«QazIndustry» AQ Jeńil ónerkásip, aǵash óńdeý, jıhaz ónerkásibin jáne qurylys materıaldary óndirisin damytý dıreksııasynyń málimetinshe, byltyr elde jıhaz ónimderin óndirý kólemi 56,7%-ǵa ósip, 165,1 mlrd teńgege jetken. Sonyń nátıjesinde salanyń jalpy ónerkásip óndirisindegi úlesi – 0,3%-dy, al óńdeý ónerkásibindegi úlesi 0,5%-dy qurady. Bul kórsetkishter 2024 jyly 0,2 jáne 0,4% deńgeıinde bolǵan.
Dıreksııa sarapshylary eń joǵary ósim keńsege arnalǵan aǵash jıhaz óndirisinde tirkelgenin aıtady. Bul segmentte óndiris kólemi 37,2% artqan. Sondaı-aq ashana men qonaq bólmege arnalǵan aǵash jıhaz óndirisi – 18,5%, metall qańqaly arnaıy otyrýǵa arnalǵan jıhaz óndirisi 2,8%-ǵa ósken. Al jatyn bólmege arnalǵan ózge aǵash jıhazdar, ıaǵnı kereýet pen shkaftan ózge ónimder, sonymen qatar as úı jıhazy segmentinde óndiris kólemi birshama tómendegen.
Ishki naryqtaǵy suranys ta turaqty ósim kórsetip otyr. Byltyr jıhaz ónimderin ishki tutyný naryǵynyń kólemi 670 mln dollarǵa jetip, aldyńǵy jylmen salystyrǵanda shamamen 3%-ǵa ulǵaıǵan. Bul rette otandyq óndirýshiler ishki naryqtyń 37,8%-yn qamtamasyz etken. Bir jyl buryn bul kórsetkish 33,7% bolǵan edi. Iаǵnı otandyq kásiporyndardyń naryqtaǵy úlesi birtindep artyp keledi degen sóz. Salaǵa salynǵan ınvestısııa kólemi de nazar aýdararlyq.
«Byltyr negizgi kapıtalǵa baǵyttalǵan ınvestısııalar 6,9 mlrd teńgeden asqan. Bul baǵytta Túrkistan oblysy kósh bastap tur. О́ńirge jalpy kólemniń shamamen 70%-y, ıaǵnı 4,8 mlrd teńge ınvestısııa tartylǵan. Qarajattyń basym bóligi keńse men saýdaǵa arnalǵan jıhaz óndirisin damytýǵa jumsalǵan», deıdi dıreksııa sarapshylary.
Jıhaz túrleriniń basym bóligi aǵashtan jasalady. Al elimizde orman qorynyń úlesi az. Sol sebepti shıkizattyń barlyǵy derlik shet memleketterden ákelinedi. Buryn daıyn materıal ǵana ımporttalsa, búginde otandyq kásipkerler aǵashty óz betinshe óńdeýge qaýqarly.
Eksport kórsetkishi de kóńil kónshitedi. Otandyq jıhazdyń shetelge satylymy 4,7 ese ósip, 72,2 mln dollarǵa jetken. Ásirese ózge metall jıhaz eksporty – 11,3 esege, metall qańqaly otyrǵysh jıhazdyń ózge túrleri 5 ese ósken. Plastmassadan jasalǵan jıhaz eksporty da 88,7%-ǵa artqan. Negizgi eksporttyq baǵyttar retinde TMD elderi atalady.
Saladaǵy oń dınamıka aldaǵy kezeńde de jalǵasyn tappaq. «QazIndustry» málimetinshe, bıyl elimizdiń ár óńirinde jıhaz óndirisine qatysty segiz jańa jobany iske qosý josparlanyp otyr.