Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen Ekonomıkalyq ósýdi qamtamasyz etý jónindegi jedel shtabtyń kezekti otyrysy ótti. Jıynda óńdeý ónerkásibiniń birqatar salalaryn damytý baǵytyndaǵy aldyn ala nátıjeler qaraldy.
Jyldyń alǵashqy eki aıynda azyq-túlik pen sýsyn óndirisinde joǵary ósim baıqalyp otyr. Azyq-túlik óndirisiniń kólemi 665 mlrd teńgege jetti. Naqty kólem ındeksi jospardaǵy 104,3%-dyń ornyna 111,9% boldy. Birinshi toqsannyń qorytyndysynda bul kórsetkish 112% bolady degen boljam bar.
Sýsyn óndirisinde de ósim baıqalady. Bul saladaǵy óndiris kólemi 175,4 mlrd teńgege jetti. Naqty kólem ındeksi 104,2% bolsa, jospar boıynsha ol 110,2% deńgeıinde bolýǵa tıis edi. Qańtar-naýryz aılarynyń qorytyndysyna boljam – 110,3%. Salystyrý úshin aıtsaq, 2025 jyldyń qorytyndysynda elimizde 1,2 trln teńgege sýsyn óndirilgen.
Aýyl sharýashylyǵy vıse-mınıstri Azat Sultanovtyń aıtýynsha, tamaq ónerkásibi keıingi jyldary turaqty damý qarqynyn kórsetip keledi.
«Tamaq ónerkásibi turaqty damyp jatyr. 2025 jyldyń qorytyndysynda tamaq ónimderin óndirý kólemi 3,9 trln teńgege jetti. Bul 2024 jylmen salystyrǵanda 8,1%-ǵa joǵary, ol kezde óndiris kólemi 3,3 trln teńge bolǵan. Al bıyl bul kórsetkishti 4,7 trln teńgege deıin jetkizý josparlanyp otyr. О́sim egis alqaptaryn ártaraptandyrý, jumys istep turǵan kásiporyndardyń júktemesin arttyrý, ishki naryqty qorǵaý men jańa ınvestısııalyq jobalardy iske asyrý esebinen bolǵan. Osy faktorlardyń qosymsha úlesi shamamen 600 mlrd teńgege baǵalanyp otyr. Bul bıylǵy jyldyń sońyna qaraı óńdelgen aýyl sharýashylyǵy ónimderiniń úlesin 70%-ǵa deıin jetkizýge múmkindik beredi», dedi Azat Sultanov.
Shıkizat bazasynyń keńeıýi men qaıta óńdeý kóleminiń artýy birqatar óndiristiń ósýine yqpal etpek. Máselen, kúnbaǵys maıynyń óndirisi 890 myń tonnaǵa deıin artady. Bul ótken jylmen salystyrǵanda shamamen 100 mlrd teńgege artyq ónim shyǵarýǵa múmkindik beredi.
Júgerini qaıta óńdeıtin eki jańa zaýyt iske qosylǵannan keıin 640 myń tonna shıkizatty qaıta óńdeý josparlanyp otyr. Sonymen qatar krahmal ónimderi men amınqyshqyldarynyń óndirisin 205 myń tonnadan 260 myń tonnaǵa deıin ulǵaıtý kózdelgen. Bul shamamen 55 mlrd teńgeniń qosymsha ónimin shyǵarýǵa múmkindik beredi.
Sút salasynda da ósim bolýǵa tıis. Bul baǵytta 2,4 mln tonna shıkizatty qaıta óńdeý josparlanyp otyr. Nátıjesinde, shamamen 36 mlrd teńgege qosymsha ónim óndirilmek. Saladaǵy iri kásiporyndar da óndiris kólemin arttyrýdy josparlap otyr. Mysaly, «Salamat» un tartý kásiporny un óndirisin 232 myń tonnadan 257 myń tonnaǵa deıin ulǵaıtýdy kózdep otyr. Bul – shamamen 11% ósim. «Qazaq Astyq Group» kásiporny ósimdik maıy óndirisin 106 myń tonnadan 126 myń tonnaǵa deıin jetkizýdi josparlaǵan. Bul – 19% ósim. «Maslo-Del» sút óńdeý kásiporny óńdelgen sút óndirisin 98,2 myń tonnadan 121 myń tonnaǵa deıin arttyrýdy kózdep otyr. Bul – 23% ósim. Al Jarkent krahmal-sirne zaýyty krahmal men sirne óndirisin 61,5 myń tonnadan 67,6 myń tonnaǵa deıin jetkizýdi josparlaǵan. Bul – 10% ósim. «Coca-Cola Almaty Bottlers» kásiporny alkogolsiz sýsyn óndirisin aıtarlyqtaı arttyrýdy kózdep otyr. Qazirgi 4,3 mlrd lıtr kólemi 6,7 mlrd lıtrge deıin ósedi dep josparlanǵan. Bul – 55% ósim. Sonymen qatar «Kýbleı» et óńdeý kásiporny men «Aıs» sút kásiporny da óndiris kólemin ulǵaıtýǵa tıis.
Jalpy, óńdeý ónerkásibiniń basqa salalarynda da oń dınamıka baıqalyp otyr. Jyldyń alǵashqy eki aıynda naqty kólem ındeksiniń joǵary ósimi tirkelgen. Mashına jasaý salasynda bul kórsetkish – 115,5%. Qurylys materıaldaryn óndirý – 127,4%. Metall buıymdary óndirisi – 131,4%. Jeńil ónerkásip – 156,4%. Rezeńke jáne plastmassa buıymdary óndirisi – 111,5%.
Saýda salasynda da ósim baıqalady. 2026 jyldyń qańtar-aqpan aılarynyń qorytyndysy boıynsha naqty kólem ındeksi 103,4% boldy. Jalpy, saýda aınalymy 9,7 trln teńgege jetti. Al ótken jyldyń osy kezeńinde bul kórsetkish 8,9 trln teńge bolǵan. Iаǵnı ósim 0,9 trln teńgeni nemese 10,2%-dy qurady.
Kóterme saýdada da oń dınamıka baıqalady. Naqty kólem ındeksi – 103,8%. Aınalym kólemi – 6,5 trln teńge. Al 2025 jylǵy qańtar-aqpanda bul kórsetkish 6,1 trln teńge bolǵan. Bólshek saýda salasy da turaqty ósimdi kórsetip otyr. Munda naqty kólem ındeksi 102,6% boldy. Jalpy aınalym 3,2 trln teńgege jetti. Al bir jyl buryn bul kórsetkish 2,8 trln teńge bolǵan. Azyq-túlik taýarlaryn satý kólemi aıtarlyqtaı artqan. О́sim +22% nemese shamamen 0,4 trln teńgeni qurady. Bul baǵyttaǵy eń joǵary ósim Túrkistan oblysynda – 112,1%. Almaty oblysynda – 110,9%. Atyraý oblysynda – 103,9%. Aqtóbe oblysynda – 102,7%. Shymkent qalasynda – 105,4%.
Azyq-túlik emes taýarlar boıynsha Mańǵystaý oblysy kósh bastap tur – 119,2%. Soltústik Qazaqstan oblysynda – 108,5%. Jetisý oblysynda – 108,1%. Shyǵys Qazaqstan oblysynda – 107,6%. Túrkistan oblysynda – 106,0%. Talqylaý qorytyndysy aıasynda vıse-premer salalyq mınıstrlikterge óndiristi keńeıtýge ári jumys istep turǵan kásiporyndardyń júktemesin arttyrýǵa kedergi keltiretin máselelerdi jan-jaqty qarastyryp, olardy sheshý joldaryn pysyqtaýdy tapsyrdy.