Ulttyq ulannyń 5512 áskerı bóliminde san túrli mamandyq ıeleri merzimdi áskerı qyzmetterin ótkerip júr. Pavlodar qalasyndaǵy áskerı bólimge Shyǵys Qazaqstan jáne Qostanaı óńirinen kelgen traktorshy mamandyǵyn meńgergen úsh sarbaz bar, dep habarlaıdy Egemen.kz.
Qatardaǵy jaýyngerler Egor Savelev, Andreı Jıdıaev jáne Vladımır Davletgarıev traktor tizgindep, ekskavator júrgizip, býldozer basqaryp, kombaınnyń tilin biletin arnaıy tehnıkalardyń júrgizýshileri. Biri áskerge deıin aýyr tehnıkamen qurylys salasynda qarqyndy jumys atqarsa, biri egis alqabynda maýsym boıy eńbek etipti. Arnaıy maqsattaǵy tehnıkalardyń qulaǵynda oınaıtyn jaýyngerler áskerge kelip te traktordan qol úzbegenine qýanyshty.
«13 jasymnan bastap úlken aǵamnyń janynda júrip, traktor júrgizýge mashyqtandym. Áskerge barar aldynda jaz boıy júrgizgen traktorymdy tazalap, ústin jaýyp ketkenmin. Áskerge kelgen sátte kók traktor kózime ottaı basyldy. Qazir áskerı bólimge tıisti tehnıkany júrgizemin. Ásker qatarynda súıikti mamandyǵymnyń iske jaraǵanyna qýanyshtymyn», deıdi qatardaǵy jaýynger Egor Savelev.
Kók traktormen qatardaǵy jaýyngerler áskerı bólimge tıisti aımaqtyń qaryn kúrep, jer qazyp taǵy da basqa sharýashylyq jumystaryn atqarady. Traktordyń qyr-syryn jetik biletin jaýyngerler tehnıkany kútip ustaıdy. Aıta keteıik, 5512 áskerı bólimi Pavlodar qalasyndaǵy qoǵamdyq qaýipsizdikti qamtamasyz etedi.
«Bul sózdi buryn aıtpappyn»: Ulttyq ulan sarbazdary analaryn merekemen quttyqtady
Aıta keteıik, buǵan deıin Kórisý kúnine oraı Ulttyq ulan áskerı qyzmetshileri ata-analary men jaqyndarymen baılanysyp, merekelik quttyqtaýlaryn jetkizgenin habarlaǵan edik.