Tótenshe jaǵdaılar mınıstrligi óz qyzmetine zamanaýı tehnologııalardy keń aýqymda engizýdi jalǵastyryp, ushqyshsyz ushý apparattaryn belsendi túrde qoldanyp keledi, dep habarlaıdy Egemen.kz.
TJM tótenshe jaǵdaılardyń aýqymyn jedel baǵalaýǵa jáne qutqarýshylardyń is-qımyldaryn úılestirýge múmkindik bere otyryp, UUA tabıǵı órt oshaqtaryn, muzdaq kólderdi, sý basý aımaqtaryn jáne basqa da tótenshe jaǵdaılardy áýeden vızýaldy baqylaý kezinde úlken kómek kórsetetin aıtty. Sonymen qatar apparattar gıdrotehnıkalyq qurylystardyń, orman alqaptarynyń jáne yqtımal qaýipti ýchaskelerdiń jaı-kúıin profılaktıkalyq baqylaý úshin paıdalanylady. Olarǵa ornatylǵan daýys zoraıtqyshtardyń kómegimen halyqty qulaqtandyrý jumystary da júrgiziledi.
Jasandy ıntellektti optıkalyq jáne teledıdarlyq jabdyqtarmen birge paıdalaný bıiktikte jáne edáýir alys jerde obektilerdi: adam kózine kórinbeıtin jerdegi adamdardy, kólik quraldaryn, kemelerdi anyqtaýǵa jáne baqylaýǵa, sondaı-aq oqıǵa ornynda tikeleı jergilikti jerdiń kartalaryn jasaýǵa múmkindik beredi.
Ulttyq ulannyń áskerı bóliminde úsh traktorshy qyzmet etedi
Búgingi kúni TJM ıeliginde 218 ushqyshsyz ushý apparaty bar, onyń ishinde 153 UUA jasandy ıntellekt fýnksııalarymen jaraqtalǵan. 2025 jyly jáne 2026 jyldyń ótken kezeńinde TJM bólimsheleri UUA qoldaný arqyly 3000-nan astam operasııa júrgizip, olardyń barysynda 46 adam qutqaryldy.
TJM zamanaýı tehnologııalardy qoldana otyryp, operatordyń qatysýynsyz avtonomdy rejımde usha alatyn UUA belsendi qoldana otyryp, UUA parkin keńeıtýdi jalǵastyrýda. Qazirgi ýaqytta eldi mekenderdiń aýmaǵynda, sondaı-aq «Shymbulaq» taý-shańǵy kýrortynda ornalasqan osyndaı 75 apparat paıdalanylýda. Olardyń jedel jaǵdaıǵa turaqty monıtorıngti qamtamasyz ete otyryp, beretin beıne derekteri 24/7 rejıminde TJM bólimsheleriniń jedel basqarý ortalyqtaryna kelip túsedi.