Ertis-Baıan óńirinde ótken aptada birneshe táýlikke ulasqan aqtútek borannyń saldarynan 300-ge jýyq mal qyryldy. Kóptegen eldi mekenge aıtarlyqtaı materıaldyq shyǵyn keldi. Eki qala men eki aýdan tabıǵı sıpattaǵy tótenshe jaǵdaı rejimin jarııalaýǵa májbúr boldy.
Oblystyq tótenshe jaǵdaılar jónindegi komıssııa otyrysynda qolaısyz aýa raıynyń saldaryn joıý sharalary qaraldy. О́ńir ákimdigi atap ótkendeı, 9-12 naýryz aralyǵynda Pavlodar oblysy aýmaǵynda jyldamdyǵy sekýndyna 30 metrge deıin jetken soltústik-batys sıklony tirkelgen. Bul oblys aýmaǵynda túsken qardyń 80%-ǵa ulǵaıýyna ákelip soqtyrǵan. Qazgıdromettiń deregine sáıkes, keıbir jerlerde qardyń qalyńdyǵy 2-den 20 sm-ge deıin artqan. Aqtoǵaı, Sharbaqty aýdandarynda qardyń qalyńdyǵy 10-20 sm shamasynda tirkelip otyr.
Energetıka jáne turǵyn úı-kommýnaldyq sharýashylyq basqarmasynyń dereginshe, qolaısyz aýa raıy kezeńinde oblystyń 96 aýyldyq eldi mekeni elektr qýatynan apattyq jaǵdaıda ajyratylǵan. Qalpyna keltirý jumystaryna 43 apattyq brıgada, 100-den astam maman tartylyp, elektrmen jabdyqtaý qysqa merzimde tolyqtaı qalpyna keltirildi.
«Tabıǵı apattyń saldarynan Ekibastuz qalasynda 75 kópqabatty turǵyn úıdiń, 9 áleýmettik nysannyń, bir ákimshilik ǵımarattyń shatyry zaqymdandy. Qazirde ǵımarattarǵa tekserý júrgizilip, keltirilgen shyǵyn kólemi naqtylanyp jatyr. Qalada jergilikti aýqymdaǵy tabıǵı sıpattaǵy tótenshe jaǵdaı jarııalandy. Tabıǵı apattan zardap shekken jeke jáne zańdy tulǵalardan ótinishter qabyldaý jalǵasady», dep habarlady oblys ákimdiginen.
Aqsý qalasynda daýyl saldarynan 32 nysannyń, sonyń ishinde turǵyn úıler men ınfraqurylym nysandarynyń shatyrlary zaqymdandanǵan. Atalǵan qalada, Baıanaýyl, Pavlodar aýdandarynda da tabıǵı sıpattaǵy tótenshe jaǵdaı rejimi engizildi. Baıanaýyl aýdany aýmaǵynda ınfraqurylym nysandary men turǵyn úı qory búlingen. 38 aýyldyq eldi mekenniń 37-sinde elektr qýatynyń óshýi tirkeldi. Sonymen qatar borannyń saldarynan 198 bas usaq mal, 2 bas iri qara, 82 jylqy qyrylǵan. Qazir boranda yǵyp ketken 600-den astam qoı izdestirilip jatyr.
Elektr jaryǵynan ajyraý derekteri Aqtoǵaı, Aqqýly aýdandarynda da tirkelgen. О́ńirlik tótenshe jaǵdaı departamentiniń aqparynsha, oblystaǵy 58 eldi meken sý tasqyny qaýpi bar aımaqtarǵa jatqyzyldy. Búginde aýyldyq jerlerden 196 myń tonnadan astam qar shyǵaryldy.
Pavlodar oblysy