Qasym-Jomart Toqaev barshaǵa teń múmkindik beretin Ádiletti Qazaqstan qurylyp jatqany týraly HIV Qysqy Paralımpıada oıyndarynyń chempıony Erbol Hamıtov pen onyń bapkerlerin marapattaý rásiminde aıtty, dep habarlaıdy Egemen.kz.
Jýyrda qabyldanǵan jańa Konstıtýsııa elimizdiń jasampaz áleýetiniń aıqyn kórinisine aınaldy.
«Jurtshylyqpen aqyldasa otyryp ázirlengen Jańa Halyq Konstıtýsııasy ulttyq rýhymyzdyń qýaty men aýyzbirshiligimizdi, toleranttylyǵymyzdy pash etedi. Zań men tártip ústemdik etetin, bilim, ǵylym, mádenıet, tehnologııa, tabıǵatty aıalaý jáne sport qundylyqtary dáripteletin qoǵamda ómir súrýge degen ortaq nıetimizdi kórsetedi. Táýelsizdigimiz, egemendigimiz ben memleketimizdiń aýmaqtyq tutastyǵy, azamattardyń quqyqtary men bostandyqtary, eńbekqorlyq, jaýapkershilik, patrıotızm, sondaı-aq adamı kapıtaldy jan-jaqty damytý sııaqty mańyzdy qaǵıdattar Ata zańymyzǵa arqaý boldy. Sondyqtan halqymyz konstıtýsııalyq reformany birtutas qoǵam bolyp jappaı qoldady, ár azamatymyz elimizdiń jarqyn bolashaǵy úshin daýys berdi. Sebebi mán-mazmuny jańarǵan Konstıtýsııa ár adamnyń damýyna jaǵdaı jasaıdy», dedi Memleket basshysy.
Memleket basshysy Paralımpıada oıyndarynyń chempıony Erbol Hamıtovty marapattady
Prezıdent Konstıtýsııamyzdyń basty maqsatyna toqtaldy.
«Ata zańda adam kapıtalyn, ıaǵnı, bilim, ǵylym salasyn jáne ınnovasııany damytý eldiń strategııalyq baǵyty retinde aıqyndaldy. Ult saýlyǵyn saqtaýǵa basa mán berildi. Konstıtýsııamyzdyń basty maqsaty – elimizdiń Táýelsizdigin, Egemendigin jáne jeriniń tutastyǵyn qorǵaý, azamattardyń quqyqtary men bostandyqtaryn qamtamasyz etý. Endi aldymyzda turǵan ózekti másele – Konstıtýsııamyzdyń negizgi qaǵıdattaryn elimizde jáne shetelde keńinen túsindirý jáne dáripteý. Qazaqstan parasportshylary ózderiniń tamasha jetistigimen, jarqyn jeńisimen memleketimizdiń myzǵymas qundylyqtaryn nyǵaıtýǵa mol úles qosyp júr dep aıtsaq artyq bolmas», dedi Qasym-Jomart Toqaev.
Erbol Hamıtovqa III dárejeli «Barys» ordeni tabystaldy
Sonymen qatar Qasym-Jomart Toqaev búginde memleket tarapynan paralımpıada salasyna jan-jaqty qoldaý kórsetilip jatqanyn aıtty.
«Byltyr elimizde 4 zamanaýı ınklıýzıvti sport kesheni jumys isteı bastady. Aldaǵy ýaqytta osyndaı ortalyqtar árbir aımaqta kóbirek ashylýy kerek. Bizdiń demeýshiler osy óte mańyzdy jumystan tys qalmaýy qajet dep oılaımyn. Jalpy, memleket paralımpıada qozǵalysyn qoldaýǵa aıryqsha mán beredi, bul baǵytty qarjylandyrý kólemi de ulǵaıdy.
Parasportshylarymyzdyń ójet minezi men muqalmas jigeri – kópke úlgi, óskeleń urpaqqa ónege. Ulttyq paralımpıada quramasynyń ár múshesi Qazaqstannyń sheksiz múmkindikter eli ekenin álemge áıgiledi. Osyǵan oraı, men sizderdi joǵary memlekettik nagradamen marapattaý týraly Jarlyqqa qol qoıdym. Barshańyzǵa qutty bolsyn! Amandyq, tabys tileımin!», dedi Prezıdent.