Senattyń Qarjy jáne bıýdjet komıtetiniń depýtattary Aqtóbede «Salyq kodeksiniń tujyrymdamalyq máseleleri jáne onyń bıznesti damytýǵa áseri» taqyryby boıynsha dóńgelek ústel otyrysyn ótkizdi.
Komıtet tóraǵasy Sultanbek Mákejanov otyrysty asha kelip, jańa Salyq kodeksi ekonomıkalyq saıasattyń negizgi quralynyń biri bolyp tabylatynyna toqtalyp, ony qoldaný tájirıbesi men bıznespen keri baılanysty eskere kelgende kodeks turaqty pysyqtaýdy talap etetinin jetkizdi. Sonymen qatar ekonomıkalyq ortanyń qubylǵan jaǵdaıynda bıýdjettiń kiris bóligin qamtamasyz etýge de, kásipkerlikti damytý úshin qolaıly jaǵdaılar jasaýǵa da baǵyttalǵan teńdestirilgen sheshimderdi ázirleýge nazar aýdaryldy.
«Kezdesýdiń maqsaty – jańa Salyq kodeksiniń erejelerin iske asyrý kezinde bıznestiń qosylǵan qun salyǵy jóninde týyndaǵan máselelerin, jańa mólsherlemeni esepteýdiń ártúrli tetikterin, arnaıy salyq tártipterin qoldaný, bıznestiń V2V ózara qarym-qatynasy, salyq esep-qısabyn toltyrý tártibin qaraý jáne talqylaý bolyp tabylady», dep atap ótti Sultanbek Mákejanov.
Ulttyq ekonomıka mınıstriniń orynbasary Azamat Ámrın jańa Salyq kodeksi salyq salýdyń neǵurlym qarapaıym, ashyq jáne ádiletti júıesin qalyptastyrýǵa baǵyttalǵanyn atap ótti. Onyń aıtýynsha, salyqtar men mindetti tólemder sany qysqartyldy, jeńildikter ońtaılandyryldy, sondaı-aq esep-qısap nysandaryn qysqartý men sıfrlyq sheshimderdi engizýmen qosa ákimshilik rásimder aıtarlyqtaı jeńildetildi.
«Atameken» ulttyq kásipkerler palatasynyń ókilderi kompanııalardyń ózara is-qımylyna, salyq júktemesine jáne shegerimderdi qoldanýǵa áser etetin jekelegen erejelermen qosa bıznes aldynda turǵan birqatar problemalyq máselelerdi atap ótti. Bul rette memlekettiń salyq jónindegi múddeleri men kásipkerlikti damytý úshin jaǵdaılar arasyndaǵy tepe-teńdikti saqtaýdyń mańyzdylyǵy aıtyldy.
Senatorlar Aqtóbe oblysyna sapar aıasynda «Aqtóbe» AEA, «Aqtóbe rels arqalyq zaýyty», «Zerde-Keramıka Aqtóbe» JShS, «Qazhrom «TUK» AQ, sondaı-aq «Aıs-plıýs», «KazFeltec» JShS jumysymen de tanysty.