«Qalaýyn tapsa, qar janar» demekshi, beı-bereket shashylǵan qaldyqtyń ózin kádege jaratýdy endi-endi úırene bastadyq. Alpysty alqymdaǵan almatylyq aǵamyz osyndaı eńbekkeshtiginiń arqasynda bas aýyrtqan baspana máselesin ǵana sheship qoıǵan joq, tóńirektiń tazalyǵyna da bir kisideı atsalysty. Úı salýǵa qajetti materıaldyń denin qoqys arasynan jıystyryp, jertólesimen qosqanda úsh qabatty kottedj turǵyzdy dep habarlaıdy 31-arna tilshileri.
Oqap Muqajanuly eldiń úıinen erekshe baspana saldy. Ádettegideı, kirpishten ne bolmasa aǵashtan emes, bos shyny shólmekterden turǵyzdy. Alty balasy bar aqsaqaldyń ne jumysy, ne zeınetaqysy joq kórinedi. Qaltany qaqqan qymbatshylyq pen turmystyń nasharlyǵy osy qadamǵa qaraı ıtermelese kerek.
Qysta jyly, jazda salqyn bul baspanaǵa 80 myńnan astam shyny bótelke jumsalypty. Oqap aǵa bir jyl ýaqytyn sarp etip jınaǵan bótelkelerdi kóshe-kósheden, dúkender men kúl-qoqystardyń arasynan taýyp otyrypty. Bir tıyn da aqsha jumsamaı salǵan záýlim úıi adam densaýlyǵyna esh zııansyz deıdi.
Eń bastysy – qaýipsiz kórinedi. Tipti, 9 balldyq jer silkinisi kezinde de bylq etpeı shydas beretindigine senimdilik tanytty.
«Balalardan tek qana sementke ǵana aqsha aldym, ishken-jegenimnen artylǵan aqshany sementke jumsadym, qalǵanynyń bárin bótelke topyraq, aǵash untaǵy, bótelkemen salyp shyqtyq», deıdi Oqap Muqajanuly.
Alty jyl buryn bastalǵan baspanasyna búginde balalary men nemereleri qonystanǵan. Záýlim úıden bólek monsha, kıiz úı men qorany da shólmekten salǵan. Bir ǵana monshanyń ózine 9 myńnan astam bótelke ketken. Al eski kúıtabaqtardy sándik úshin jabystyrǵanyn aıtady.
Eshkimniń kómeginsiz záýlim baspana turǵyzǵan aǵamyz qazir úıdiń ishki bólmelerine kúrdeli jóndeý jumystaryn júrgizip jatyr. Shynydan shańyraq kótergen aqsaqaldyń endigi armany – nemereleri oınaıtyn shaǵyn oıyn alańyn salyp berý.
«Egemen-aqparat».