Qazaqstandaǵy Reseıdiń mádenıet kúnderi aıasynda Ulttyq mýzeıde «Mádenı dástúrlerdi biriktirý jáne zamanaýı shyǵarmashylyq tájirıbeler: Qazaqstan men Reseıdiń mádenı yntymaqtastyǵy» taqyrybynda dóńgelek ústel ótti, dep habarlaıdy Egemen.kz.
Is-sharaǵa Premer-mınıstrdiń orynbasary – Mádenıet jáne aqparat mınıstri Aıda Balaeva, Reseı Federasııasy mádenıet mınıstriniń orynbasary Andreı Malyshev, sondaı-aq eki eldiń mýzeı, teatr, bilim berý, kıno jáne konserttik uıymdar salasyndaǵy kásibı qaýymdastyq ókilderi qatysty.
Aıda Balaeva Qazaqstan men Reseı arasyndaǵy mádenı baılanystardyń strategııalyq mańyzyn atap ótti. Onyń aıtýynsha, taraptar birlesken kórmeler uıymdastyrý, kınofestıvalder ótkizý, shyǵarmashylyq ujymdardyń gastroldik saparlaryn damytý baǵytynda júıeli jumys júrgizip keledi. Sonymen qatar mádenı-gýmanıtarlyq salada jańa ózara is-qımyl tetikteri qarastyrylyp jatyr.
«Kezdesýlerimizdiń dástúrli sıpat alýy óte mańyzdy. О́tken jyly da osyndaı dóńgelek ústelde bas qosyp, yntymaqtastyqtyń keleshegin talqylaǵan edik. Búginde mádenıet salasynyń barlyq baǵytynda naqty nátıjeler bar. Bul mýzeı jáne arhıv isinen bastap, teatrlar men konserttik uıymdar arasyndaǵy baılanystarǵa deıingi keń aýqymdy qamtıdy. Osyndaı dıalogtar naqty nátıjeler berip, mádenı-gýmanıtarlyq baılanystardy odan ári nyǵaıtýǵa jol ashyp otyr. Búgingi kezdesý de jańa bastamalarǵa jáne birlesken jobalardy keńeıtýge múmkindik beredi», dedi Aıda Balaeva.
Reseı mádenıet mınıstriniń orynbasary Andreı Malyshev te ekijaqty yntymaqtastyqtyń joǵary deńgeıin atap ótti.
«Qazaqstanmen mádenıet jáne óner salasyndaǵy áriptestikke erekshe mán beremiz. Qazaqstan tarapynan reseılik mádenıet qaıratkerlerine árdaıym jyly qabyldaý kórsetiledi. Bul ortaq mádenı keńistik pen rýhanı qundylyqtardyń sabaqtastyǵyn dáleldeıdi. Reseıde ótken Qazaqstan mádenıeti kúnderi de úlken mádenı oqıǵaǵa aınaldy. Endigi mindet – aldaǵy jyldardaǵy yntymaqtastyqty naqty mazmunmen tolyqtyrý», dedi ol.
Dóńgelek ústel barysynda mýzeı isine erekshe nazar aýdaryldy. Qazaqstan Respýblıkasynyń Ulttyq mýzeıi men I Petr atyndaǵy Antropologııa jáne etnografııa mýzeıi qazaq etnografııalyq materıaldarynyń katalogyn birlesip ázirleý jóninde kelisimge keldi. Sonymen qatar Memlekettik Ermıtajben birlesip, 2027 jyldyń kúzine josparlanǵan jańa arheologııalyq kórmeler men ózara ekspozısııalar daıyndaý jumystary júrgizilip jatyr.
Bıyl kúzde Ábilhan Qasteev atyndaǵy Ulttyq óner mýzeıinde Memlekettik Tretıakov galereıasy qorynan alynǵan týyndylar usynylatyn «HH vek rýsskogo ıskýsstva v 30 shedevrah» atty kórme ashylady.
Restavrasııa salasyndaǵy yntymaqtastyq ta jańa deńgeıge kóterilip jatyr. Qazaqstan tarapy mamandardyń Reseı restavrasııalyq ortalyqtarynda taǵylymdamadan ótý baǵdarlamalaryn jalǵastyrýǵa daıyn ekenin bildirdi. Sondaı-aq shekaralas aımaqtardaǵy mýzeılermen katalogtaý jáne arhıv isi boıynsha birlesken jobalar tereńdetilmek.
Kınoındýstrııa salasynda festıvaldik kórsetilimdermen qatar birlesken fılmder túsirýge basymdyq berilip jatyr. «ROSKINO» uıymy ortaq praktıkalyq jobalardy iske asyrýǵa qyzyǵýshylyq tanytty. «Qazaqfılm» ulttyq kınostýdııasy da «Vremıa» kórkem fılmi boıynsha jumysty jalǵastyrýǵa daıyn ekenin rastady. Túsirilimder Qazaqstan men Reseı aýmaǵynda ótedi dep josparlanǵan. Sonymen birge Reseı Memlekettik kınoqorynda saqtalǵan qazaq kıno murasyn sıfrlandyrý jumystary júrgizilip jatyr.
Kezdesýde jas kompozıtorlar arasyndaǵy tájirıbe almasý, djaz ónerin damytý, konserttik alańdar arqyly yntymaqtastyqty kúsheıtý máseleleri de talqylandy. Horeografııa salasyn damytýǵa erekshe kóńil bólinip, birlesken bilim berý baǵdarlamalary, taǵylymdamalar, sheberlik sabaqtary jáne qos dıplomdy oqytý júıesin engizý múmkindigi qarastyryldy.
Teatr, kıno jáne dıalog: Astanada Reseıdiń mádenıet kúnderi ótedi
Jıyn sońynda Aıda Balaeva aıtylǵan barlyq usynystar aldaǵy birlesken jumystyń negizine aınalatynyn atap ótti. Ol 2027-2028 jyldarǵa arnalǵan ózara is-qımyl jospary taraptardyń naqty bastamalarymen tolyqtyrylatynyna senim bildirdi.
Kezdesý qorytyndysy boıynsha Qazaqstan Respýblıkasynyń Ulttyq mýzeıi men Reseı Federasııasynyń Reseı etnografııalyq mýzeıi arasynda yntymaqtastyq týraly memorandýmǵa qol qoıyldy. Qujat taqyryptyq katalogtardy birlesip ázirleýdi, ǵylymı-ádistemelik baǵyttardy damytýdy, sondaı-aq sýretshiler, restavratorlar jáne mýzeı salasynyń mamandary arasyndaǵy baılanystardy nyǵaıtýdy kózdeıdi.