Turǵyn úı kezeginde turǵan azamattar óz mártebesin endi onlaın ońaı teksere alady. Bul týraly «Otbasy bank» arnaıy nusqaýlyq jarııalady, dep habarlaıdy Egemen.kz.
Turǵyn úı kezegin tekserý úshin azamattar «Otbasy bank» resmı saıtyna kirýi qajet. Qolaıly bolý úshin kompıýter nemese noýtbýk qoldanǵan jón, sebebi mamandar mobıldi qurylǵyda keıbir málimetter tolyq ashylmaýy múmkin ekendigin eskertedi.
Paıdalanýshy «Qoljetimdi baspana» bóliminen «Turǵyn úıge muqtaj azamattar tizimin» tańdap, Excel formatyndaǵy faıldy júkteı alady.
Sonymen qatar, azamattar óz sanatyn (kópbalaly otbasy, memlekettik qyzmetker, jetim balalar jáne t.b.) tańdaý arqyly naqty kezegin kóre alady. Sondaı-aq júıede JSN engizý arqyly tek mártebeni ǵana bilýge bolady.
Turǵyn úı kezegindegi ózgerister: 16 myńnan astam adam tizimnen shyǵaryldy
Turǵyn úı kezegin rastaý úshin azamattar «Orken Otbasy Bank» platformasy arqyly ınventarızasııadan ótýge tıis. Bul rásim ár otbasy múshesiniń jeke rastaýyn talap etedi jáne kezekte turý quqyǵyn saqtaýǵa múmkindik beredi.
Mamandardyń aıtýynsha, turǵyn úı kezeginiń mártebesin mindetti túrde tekserip otyrý qajet. Eger statýs «Toqtatylǵan» dep kórsetilse, bul kezektiń ýaqytsha toqtatylǵanyn bildiredi. Al «Aktýaldy» mártebesi kezektiń belsendi ekenin kórsetedi.
Elimizde baspana kezegine 18 jastan asqan Qazaqstan azamattary nemese qandastar ótinish bere alady. Negizgi shart – sońǵy 5 jylda menshiginde turǵyn úıdiń bolmaýy jáne turaqty tirkeýdiń bolýy. Astana, Almaty jáne Shymkent qalalarynda tirkeý merzimi keminde 3 jyl bolýy qajet.
Aıta keteıik, 2026 jyly el turǵyndary zeınetaqy jınaqtaryn turǵyn úı satyp alýǵa kóptep paıdalana bastaǵan. Úsh aı ishinde osy maqsatta BJZQ-dan shamamen 135 mlrd teńge sheship alynǵan.