Qazaqstannyń 27 jolaýshylar poıyzyna spýtnıktik ınternet qosylady. Bul týraly Úkimet basshysynyń orynbasary – Jasandy ıntellekt jáne sıfrlyq damý mınıstri Jaslan Madıev depýtattyq saýalǵa bergen jaýabynda málimdedi, dep habarlaıdy Egemen.kz
Vedomstvo málimetinshe, baılanys OneWeb jáne Starlink sııaqty negeostasıonarlyq spýtnıktik júıeler arqyly qamtamasyz etiledi.
Budan bólek, el aýmaǵyndaǵy respýblıkalyq mańyzy bar avtomobıl joldarynda baılanys sapasyn jaqsartý úshin antenna-dińgek qurylǵylar ornatylady. 2027 jyly oblystyq joldar boıynda qosymsha 243 munara salý josparlanǵan.
Jasandy ıntellekt jáne sıfrlyq damý mınstrligi men Týrızm jáne sport mınıstrligi 50 týrıstik nysanda 4G mobıldi ınternetin engizýdi qolǵa almaq. Bul jumys 2027-2028 jyldary júzege asady.
Poıyzdardyń qozǵalysyn retteý úshin Starlink spýtnıktik júıesi qoldanylady
Sondaı-aq mınıstr jaýabynda telekommýnıkasııa ınfraqurylymynyń ınteraktıvti sıfrlyq kartasy ázirlenip jatqandyǵy aıtylǵan.
«Bul karta Qazaqstannyń barlyq aýmaǵynda uıaly baılanystyń (2G, 3G, 4G, 5G) qamtylýyn jáne sapa deńgeıin, sonymen qatar talshyqty-optıkalyq baılanys jelileriniń bar-joǵyn kórsetedi. Karta naqty ýaqyt rejıminde eldi mekenderdiń, avtomobıl joldarynyń, týrıstik nysandardyń jáne basqa da aýmaqtardyń baılanyspen qamtamasyz etilý deńgeıin anyqtaýǵa, sondaı-aq tómen sapaly nemese baılanys joq aımaqtardy belgileýge múmkindik beredi. Jalpy alǵanda, atalǵan baǵyttar boıynsha jumys jalǵasýda jáne Úkimet baqylaýynda tur», delingen jaýapta.
KTJ málimetinshe, 2026 jyldyń jazǵy maýsymynda Qazaqstan temir joly shamamen 4,2 mıllıon jolaýshyny tasymaldaýdy josparlap otyr. Osyǵan baılanysty Balqash jáne Alakól baǵytyna qosymsha poıyzdar qatynamaq.