Astananyń Saryarqa aýdanynda ornalasqan «Palaý ortalyǵynda» órt boldy. Tótenshe jaǵdaılar mınıstrliginiń málimetinshe, órt Beısekova kóshesindegi saýda úıi aýmaǵyndaǵy jeke turǵan ǵımarattan shyqqan, dep habarlaıdy Egemen.kz.
Oqıǵa kezinde ashana bólmeleri men shatyr órtengen. Oqıǵa ornyna kelgen qutqarýshylar órtti 12 mınýt ishinde oqshaýlap, 40 sharshy metr aýmaqta tolyq sóndirdi.
Zardap shekkender joq. Qazir órttiń shyǵý sebebi anyqtalyp jatyr.
Eske salaıyq, bıyl aqpanda Shýchınskide turǵyn úıge japsarlas ornalasqan «Palaý ortalyǵynda» gaz jarylyp, artynsha iri órt bolǵan edi. Qaıǵyly oqıǵadan 12 adam qaza tapty.
Osy oqıǵadan keıin kafe ıesi eki aıǵa tergeý ızolıatoryna qamaldy. Keıin is boıynsha gaz quıý beketiniń dırektory men gaz ballondaryn jetkizýshi de ustalǵan.