ASTANA. 1 naýryz. VTB lıgasy aıasynda «Astana» basketbol komandasy syrt alańda Saratovtyń «Avtodoryn» 94:83 esebimen jeńdi. Bul týraly egemen.kz habarlady.
Oıynnyń alǵashqy mınýtynda «Astananyń» kóshbasshy oıynshysy Djerrı Djonson saýsaǵyn jaraqattap aldy. Nátıjesinde, bas jattyqtyrýshy Ramýnas Býtaýtas oıyn órnegine taktıkalyq ózgeris engizýge májbúr boldy. «Avtodordyń» senim artqan oıynshysy Kortnı Fortsondy shákirtteri Anatolıı Kolesnıkov pen Pavel Ilınge tapsyryp, alań ıeleriniń basty úılestirýshisin tusap qoıdy. Lıtvalyq mamannyń bul áreketi óz jemisin berip, «Astana» alǵashqy eki kezeńde jeńiske jetti.
Úlken úzilisten keıin shıraq qımyldaǵan saratovtyqtar esep aıyrmasyn aıtarlyqtaı qysqartyp, sońǵy eki kezeńdi óz paıdalaryna aıaqtady. Degenmen, «Avtodor» oıynshylary jeńilisten qashyp qutyla almady. Osy jeńisinen keıin «Astana» Lıganyń pleı-off kezeńine shyǵý úmitin saqtap qaldy. Evrochellendj týrnırinde toptan shyǵa almaǵan qazaqstandyq komanda búginde bir ǵana halyqaralyq saıysta baq synaýda. Sondyqtan, Býtaýtas bapker VTB lıgasynda jaqsy nátıje kórsetý úshin bar kúsh-jigerin salary anyq. «Astana» ázirge týrnır kestesiniń 10-satysynda keledi. Al pleı-off kezeńine úzdik 8 komanda shyǵatyny belgili. «Avtodor» bizden jeńilgenine qaramastan, 7-orynǵa taban tirep tur.
Osy tartysta eń kóp upaı jıǵan «Astana» komandasynyń oıynshysy Djerrı Djonson. Ol 40 mınýttyń ishinde 22 upaı jıyp, 8 márte áriptesterine nátıjeli pas shyǵardy. Al «Avtodor» sapynan eń kóp upaı Kırıll Fesenkonyń enshisine jazyldy. Fesenko oıyn barysynda 21 upaıdy óz atyna jazǵan eken.
«Astana» Lıgadaǵy kelesi oıynyn 4 naýryz kúni óz alańynda Samaranyń «Krasnye krylıa» komandasyna qarsy ótkizedi. Qos komanda arasyndaǵy kezdesý «Saryarqa» respýblıkalyq velotreginde ótetini belgili.
Aıta keteıik, «Astana» búginge deıie óte súreńsiz oınap keldi. Sonyń nátıjesinde, komandanyń basshylary bas jattyqtyrýshyny almastaryp, Ramýnas Býtaýtas mamanǵa senim artty. Ázirge lıtvalyq mamannyń nátıjesi jaman emes. Ásirese, sońǵy úsh oıynda qatarynan úsh jeńiske jetken basketbolshylarymyz jergilikti jankúıerlerdiń alǵysyna bólendi. Osy oıynnyń aldynda Lıga aıasynda estonııalyq «Kalevten» basym túsken bolatyn. Sondaı-aq, evrochellendj týrnırindegi bıylǵy maýsym úshin sońǵy oıynda belgııalyq «Okapı Allstardy» tize búktirdi.
Elaman Qońyr.
Derek: egemen.kz.
Sýret: bcastana.kz.