Astanadaǵy «Zodiak» klýbynda bılıardtan qoǵam qaıratkerleri men BAQ ókilderi arasynda Aqseleý Seıdimbek atyndaǵy týrnır ótti. Bul sharada bas-aıaǵy alpysqa jýyq elge tanymal azamat baq synady.
Bıylǵy sharanyń ereksheligi – «Uly Dalanyń Aqseleýi» atty kitaptyń jaryq kórýi. Jarystyń ashylý saltanatynda sóz alǵan Qoıshyǵara Salǵarauly kitap jaıly jan-jaqty tarqatyp aıtyp berse, «Egemen Qazaqstan» respýblıkalyq gazeti» AQ prezıdenti Saýytbek Abdrahmanov Aqseleý Seıdimbek týraly aıta kelip, kitapta keltirilgen Ábish Kekilbaevtyń ádemi sózimen túıindedi.
Týrnır shartyna sáıkes, qatysýshylar jasy alpystan asqandar – «Aǵalar» toby, alpysqa deıingiler – «Jastar men jasamystar» toby bolyp ekige bólindi. «Aǵalar» tobynda Tólen Ábdik, Qoıshyǵara Salǵarauly, Namazaly Omashev, Júrsin Erman syndy jıyrmaǵa jýyq aqyn-jazýshy men qoǵam qaıratkerleri óner kórsetti.
Al «Jastar men jasamystar» tobynda Sharhan Qazyǵul, Shúkir Shahaı, Dáýletkereı Kápuly syndy qyryqqa jýyq belgili jýrnalıst-qalamger sheberlikterin pash etti. Oıynshylardy jekeleı toptarǵa bólý úshin arnaıy jerebe de tartyldy.
Nátıjesinde, «Aǵalar» tobynan birinshi oryndy fınalda jazýshy Qoıshyǵara Salǵaraulyn jeńgen professor Namazaly Omashev ıemdense, úzdik úshtikti qoǵam qaıratkeri Tólen Ábdik qorytyndylady.
«Jastar men jasamystar» tobynda da básekelestik óte joǵary ótti. Jyl saıyn atalmysh týrnırdiń jeńimpazy bolyp júrgen Shúkir Shahaı fınalda súrindi. Onyń jolyn bul joly jas aıtysker aqyn Erkebulan Qaınazarov kesti. Bir qyzyǵy, byltyr gazetimizdiń 95 jyldyq mereıtoıyna oraı uıymdastyrylǵan týrnırde Qaınazarov, tipti, toptyq básekeden asa almaǵan edi. Sol kezde ol Aqseleý Seıdimbek atyndaǵy týrnırge tyńǵylyqty daıyndalyp kelemin degen-di. Mine, ýádesinde turyp, bul joly týrnır jeńimpazy atandy. Al úshinshi oryn taǵy bir aıtysker aqyn Kópjasar Aldabergenovke buıyrdy.
Nátıjesinde, jeńimpazdar baǵaly syılyqtarmen marapattalyp, olarǵa kýbok pen medal tabys etildi. Sonymen qatar, qatysýshylar týrnırdiń «Eń syıly qatysýshysy», «Eń mádenıetti oıynshysy», «Jeńimpaz bolýǵa erekshe umtylys tanytqany úshin» sekildi atalymdar boıynsha marapattaldy.
Almas MANAP,
«Egemen Qazaqstan».