Taldyqorǵan qalasyndaǵy oblystyq kardıologııalyq ortalyqta alǵash ret júrek jetkiliksizdiginiń aýyr túrimen aýyratyn naýqasqa jasandy sol jaq qarynsha (LVAD) ornatyldy. Jergilikti bilikti mamandardyń jeke tájirıbesiniń nátıjesinde operasııa sátti ótti. Bul – Jetisý oblysynyń medısına salasyndaǵy tarıhı oqıǵa.
Buǵan deıin mundaı joǵary tehnologııaly operasııalar negizinen respýblıkalyq deńgeıdegi ortalyqtarda ǵana jasalyp kelse, endi óńir turǵyndary kúrdeli medısınalyq kómekti óz oblysynda ala bastady. Tórt saǵatqa sozylǵan operasııaǵa Jetisý kardıologııalyq ortalyǵy men Astana qalasyndaǵy «Júrek ortalyǵynyń» mamandary qatysty. Jalpy sany 15 medısına qyzmetkeri jumylǵan kúrdeli hırýrgııalyq aralasý sátti aıaqtaldy. Bul – bir ǵana operasııanyń nátıjesi emes, jyldar boıy qalyptasqan tájirıbe men óńirlik medısınanyń júıeli damýynyń jemisi.
Oblystyq kardıologııalyq ortalyqtyń dırektory Nursana Sýrashevtiń aıtýynsha, mundaı tehnologııalardy engizý jergilikti turǵyndarǵa joǵary tehnologııaly medısınalyq kómektiń qoljetimdiligin arttyra túsedi.
«Bul bizdiń ujym úshin úlken kásibı tájirıbe boldy. Aldaǵy ýaqytta osyndaı kúrdeli operasııalardy jergilikti mamandardyń ózderi de tolyq kólemde oryndaı alady dep senemiz. Eń bastysy – joǵary tehnologııaly medısınalyq kómekti halyqqa jaqyndatý. Ár naýqastyń sapaly em alýǵa alysqa sabylmaı, óz óńirinde qajetti kómekti alýyna jaǵdaı jasaýymyz kerek», deıdi ortalyq basshysy.
Jasandy sol jaq qarynsha júrek bulshyq eti álsiregen kezde onyń qyzmetin qoldap, aǵzadaǵy qan aınalymyn qamtamasyz etedi. Mundaı qurylǵy kóbine júrek transplantasııasyn kútip júrgen nemese júrek jetkiliksizdiginiń sońǵy satysyndaǵy naýqastarǵa ómir syılaıtyn múmkindik retinde qarastyrylady.
Búginde oblys kóleminde júrek-qan tamyrlary aýrýlarymen dıspanserlik esepte 90 myńǵa jýyq adam tur. Olardyń arasynda joǵary tehnologııaly medısınalyq aralasýdy qajet etetin naýqastar da bar. Sondyqtan mundaı operasııalardyń óńirde qolǵa alynýy myńdaǵan turǵyn úshin mańyzdy jańalyq. Osy rette «Júrek ortalyǵynyń» №2 kardıohırýrgııalyq bóliminiń meńgerýshisi Svetlana Novıkova da bul bastamanyń áleýmettik mańyzyna erekshe toqtaldy.
«Buryn mundaı dıagnozy bar naýqastar mindetti túrde Astanaǵa nemese basqa iri qalalarǵa joldanatyn. Bul naýqastyń ózine ǵana emes, otbasy múshelerine de úlken salmaq túsiretin. Endi turǵyndar emdeý, baqylaý, ońaltý qyzmetterin óz óńirinde ala alady. Bul medısınalyq kómektiń qoljetimdiligin arttyryp qana qoımaı, adamdardyń ómir sapasyna da oń áser etedi», deıdi kar-dıohırýrg.
Jalpy, keıingi jyldary óńirde kardıologııalyq qyzmet qarqyndy damyp keledi. Ashyq júrekke jasalatyn operasııalarmen qatar, az ınvazıvti emdeý tásilderi de keńinen engizilýde. Atap aıtqanda, aýyr arıtmııalardy emdeýge arnalǵan úsh kameraly kardıoverter-defıbrıllıatorlar ornatý, sondaı-aq mıtraldy qaqpaqsha jetkiliksizdigin ashyq operasııasyz túzetýge múmkindik beretin MitraClip tehnologııasy sátti qoldanylyp jatyr.
Árıne, óńirdegi medısına salasynda maman tapshylyǵy máselesi áli de ózekti. Ásirese joǵary tehnologııaly baǵyttarda tájirıbeli dárigerlerge suranys joǵary. Degenmen, soǵan qaramastan, jergilikti mamandar respýblıkalyq ortalyqtarmen tyǵyz baılanys ornatyp, jańa tehnologııalardy meńgerip, kúrdeli operasııalardy júzege asyryp keledi.
Oblys ákimi baspasóz qyzmetiniń málimetinshe, jyl basynan beri oblystyq kardıologııalyq ortalyqta koronarografııa, stentteý, arıtmııany emdeý baǵytynda 1200-den astam joǵary tehnologııaly medısınalyq qyzmet kórsetilgen. Bul kórsetkish – óńir medısınasyndaǵy oń ózgeristerdiń naqty kórinisi.
Taldyqorǵanda alǵash ret jasalǵan jasandy qarynsha ımplantasııasy – bir naýqastyń ǵana emes, tutas óńir medısınasynyń jetistigi. Jergilikti dárigerlerdiń kásibı áleýeti ósip, zamanaýı medısınanyń múmkindikteri oblys turǵyndaryna burynǵydan da jaqyndaı túskeniniń aıqyn dáleli.
Jetisý oblysy