Astanadaǵy EQYU baǵdarlamalar ofısi Ońtústik Qazaqstan oblysynyń ortalyǵy – Shymkent qalasynda ótken Qazaqstanda adam saýdasymen kúres salasyndaǵy adam quqyqtaryn qorǵaýdyń ózekti máseleleri boıynsha arnaıy baıandama tusaýkeserine qatysyp, zorlyq-zombylyqtan zardap shekkenderge áleýmettik kómek kórsetý boıynsha dóńgelek ústel jumysyna járdem jasady.
Arnaıy baıandama Qazaqstan Respýblıkasy Prezıdenti janyndaǵy Adam quqyqtary jónindegi komıssııa men halyqaralyq jáne úkimettik emes uıymdardyń ózara is-qımyly nátıjesinde ázirlendi. Ol EQYU-nyń osy saladaǵy keıbir qyzmetin jáne EQYU Adam saýdasyna qarsy kúres jónindegi arnaıy ókili men úılestirýshisiniń 2013 jáne 2014 jyldary Qazaqstanǵa saparlarynyń qorytyndylary boıynsha jasalǵan esepteriniń usynymdaryn qamtıdy.
Adam saýdasynyń qurbandaryna kómek kórsetýge qatysy bar 150-ge jýyq qatysýshy, sonyń ishinde ortalyq jáne aımaqtyq bılik organdary, Adam quqyqtary jónindegi komıssııanyń músheleri, ǵalymdar, azamattyq qoǵam belsendileri men quqyq qorǵaýshylar, Halyqaralyq kóshi-qon uıymy jáne el óńirlerinen kelgen úkimettik emes uıymdardyń ókilderi arnaıy baıandamany talqylaýǵa saldy. Qatysýshylar eseptiń qorytyndylaryna, atap aıtqanda, adam saýdasynan zardap shekkenderge arnalǵan Ulttyq qaıta baǵyttaý tetigin qurýǵa jáne olardy áleýmettik qyzmet kórsetýmen qamtamasyz etýge baǵyttalǵan usynymdaryna qoldaý bildirdi.
«Úkimet pen azamattyq qoǵam adam saýdasy qurbandaryna kómek kórsetýdegi úılestirýdi kúsheıtý úshin birge jumys isteýge tıis. Halyqaralyq uıymdar men aımaqtyq úkimettik emes uıymdardyń bastamalary quzyretti memlekettik organdardyń tarapynan tıisti baǵalaýdy taba almaı otyr. Biz azamattyq qoǵam uıymdarynyń áleýetin paıdalanyp, adam saýdasy qurbandarynyń ózderiniń quqyqtary týraly habardar bolýyna erekshe nazar aýdarýymyz kerek», – dedi Ońtústik Qazaqstan oblysy ákiminiń orynbasary Saparbek Tuıaqbaev.
«Adam saýdasy adam quqyqtaryn óreskel buzý bolyp tabylady jáne ol, eń aldymen, transulttyq uıymdasqan qylmystyń eń aýyr túrleriniń birine jatady. Onymen tıimdi kúresý úshin ulttyq jáne halyqaralyq deńgeılerde kelisilgen, júıeli jáne úılestirilgen tásildiń bolýy qajet», – dep atap ótti Astanadaǵy EQYU baǵdarlamalar ofısiniń basshysy, elshi Natalııa Zarýdna.
Is-sharaǵa Densaýlyq saqtaý jáne áleýmettik damý, Ishki ister mınıstrlikteriniń, oblys ákimdiginiń ókilderi, Adam quqyqtary jónindegi komıssııa músheleri men sarapshylary, sondaı-aq halyqaralyq jáne úkimettik emes uıymdardyń ókilderi qatysty.
«Egemen-aqparat».