ASTANA. 3 naýryz. Qurlyqtyq hokkeı lıgasynyń pleı-off kezeńinde «Barys» óz aıdynynda ombylyq «Avangardty» 3:0 esebimen jeńdi. Osylaısha, qos komanda arasyndaǵy jalpy esepte astanalyqtar 2:1 esebimen alǵa shyqty. Bul týraly egemen.kz habarlady.
Oıynnyń 5-mınýtynda «Avangard» sapynan Nıkolaı Glýhov kishi aıyppen jazalanyp, «Barys» oıynshy basymdyǵyna ıe boldy. О́zderine berilgen múmkindikti múlt jibermegen aıdyn ıeleri 7-mınýtta esep ashyp, jergilikti jankúıerlerdiń alǵysyna bólendi. Shaıba Glýhovtyń aıdynǵa shyǵýyna nebári 4 sekýnd qalǵan kezde soǵylǵanyn aıta keteıik. Mergendigimen kózge túsken Konstantın Rýdenko.
Ekinshi kezeńdi «Barys» hokkeıshileri aıqyn basymdyqpen ótkizdi. Tipti kezeńniń alǵashqy jartysynda qonaqtar bizdiń aımaqqa múldem betteı almady desek te bolady. Tartystyń 29-mınýtynda Naıdjel Doýs esepti eselep, «Barys» 2 shaıba basymdyǵyna ıe boldy. Ombylyqtar tek sheshýshi kezeńde ǵana júıeli shabýyl uıymdastyra bildi. Degenmen, qorǵanysta óte saýatty oınaǵan Andreı Nazarovtyń shákirtteri qarsylastaryna esepti qysqartýǵa múmkindik bermedi. Esesine 56-mınýtta «Barys» sapynan Dastın Boıd esepti 3:0-ge jetkizip, oıyndaǵy sońǵy shaıbanyń avtory atandy. Osylaısha, Iаn Laso ekinshi oıyn qatarynan qaqpasyna shaıba jibergen joq. Búgingi oıyn barysynda Laso 41 soqqyny qaıtarǵanyn aıta keteıik.
Qos komanda arasyndaǵy aıqas erteń, ıaǵnı, 4 naýryz kúni jalǵasyn tabady. Astanadaǵy «Qazaqstan» sport saraıynda ótetin oıyn keshki saǵat 19:30-da bastalady.
Elaman Qońyr.
Derek: egemen.kz.
Sýret: hcbarys.kz.