Máýeli báıterekteı japyraǵy jaıylǵan áýlettiń bastaýynda turǵan Keńes oń-solyn tanyǵan jigit shaǵynda eńbek jolyn temirjol salasynda bastapty. Symdaı tartylǵan qos relspen árli-berli júıtkigen poıyz quramalaryna qyzyǵa qaraýshy edi. Batystan shyǵysqa, shyǵystan batysqa bet alǵan teplovoz gúriline qulaq túretin. О́zi de tepolovoz júrgizsem dep qııalǵa beriletin. Júrek túkpirine uıalaǵan sol qushtarlyq ony temirjol salasymen bite qaınastyryp jiberdi. Sondaı áýlettiń biri – Aımurzaevtar.
О́zi unatqan, júregimen qalaǵan salaǵa jumysqa ornalasqan Keńes Aımurzaev temirjoldan eshqaıda bet burmady. Eńbek jolyn tek osy salamen ǵana baılanystyrdy. Taǵylymdy tálimin úıretken aldyńǵy tolqyn aǵalardy qurmettedi. О́zinen keıingi býyndy temir jol salasynyń qyr-syryna baýlydy. Mańdaı terin tóge eńbek etip, osy saladan zeınetkerlikke shyqty. Aıtqandaı, ómirlik serigi Ulbolsynmen júregi úndesip, shańyraq kóterdi. Ol da osy salada eńbek etti. Erli-zaıypty Aımurzaevtardyń otbasynda dúnıege kelgen 8 balanyń beseýi óz kásipterin temirjol salasynan tapty. Árıne, Keńes pen Ulbolsyn balalaryna temirjolshy bolyńdar demedi. Balarynyń ózderi ata-ana kásibin jalǵastyrýdy qalapty. О́ıtkeni, balalary bir-birine udaıy qurmetpen, syılastyqpen qaraıtyn ata-anasyn maqtanysh tutty. Eńbek adamy retinde ujymynda úlken qurmetke bólengenine qyzyǵa qarady.
– Keńes eshqashan adaldyqtyń ala jibin attaǵan joq. Úlkendi syılaýdy biledi, ózinen keıingilerge qamqorlyǵyn aıamady. Osyndaı adamgershiligi úshin ony bári qurmettedi, –deıdi «Altyn alqa» ıegeri Ulbolsyn Aımurzaeva. – Ony balalarymyz da úlgi-ónege etti.
Aımurzaevtardyń temirjol salasyndaǵy eńbek jolyn abyroıly jalǵastyrǵan urpaǵynyń biri – qyzy Irına. «Áke-sheshemizdiń temirjol salasynda eńbek etkenin kóre júrip, men de ómirimdi temir jolmen baılanystyrǵym keldi. Ras, ákem temirjol kóliginde áıelderdiń jumys jasaýyna úzildi-kesildi tyıym salynady deýshi edi. Tipti, ınstıtýtqa oqýǵa qujat tapsyrǵanymda da sol aıtqanyn qaıtalady. Biraq, ata-ananyń jolyn jalǵastyrýdy maqsat ettim» deıdi ol.
Bir kezderi temirjolda taǵdyry toǵysqan Keńes pen Ulbolsyn ata-áje atanǵan zeınetkerler bolǵanmen, ózderiniń eńbek joly bastaý alǵan salanyń qurmetti ardagerleri atandy. Jalpy, Aımurzaevtar áýletindegi temirjolshylar qatary 19 adamǵa jetti. Áýlettegi 8 bala men 9 nemere temirjoldyń bilgir mamandary atandy. Olardyń birazy Almatyda, keıbiri Atyraý qalasy men munaıly óńirdiń ár túkpirinde turady. Alaıda, olardyń barlyǵy kásibı mereke qarsańynda balalyq baldáýreni ótken qarashańyraqta bas qosady. Sóıtip, aldymen Keńes qarııa men Ulbolsyn ájeni kásibı merekemen quttyqtaıdy.
– Men baqyttymyn, aınalaıyndar! Japyraǵym jaıylsa eken degen armanym oryndaldy. Eńbek jolymdy jalǵastyrǵan sender aman-esen júrińder. О́zderiń qalaǵan mamandyqqa adaldyqtan aınymańdar. О́tirik aıtýdan aýlaq bolyńdar. Adal eńbek ǵana abyroıǵa bóleıdi. Baqýatty turmysqa jetkizedi. Analaryń ekeýmiz adal eńbek ettik. Muqtaj jandarǵa qoldaýymyzdy kórsettik. Úlkendi qurmettedik, kishige qoldaý bildirdik. Mine, sonyń arqasynda búgingi baqytty kúnimizge jettik, – dep ardager temirjolshy Keńes qarııa urpaǵynyń ortasynda mereılenip otyrady.
Aımurzaevtar áýletiniń Qurmanǵazy aýdanyndaǵy qarashańyraǵynda bala kúlkisi tyıylǵan emes. Nemereleriniń bal qylyǵyn qyzyqtaýdan sharshamaıtyn ardager temirjolshylardyń dastarqany da udaıy jaıýly turady. О́ıtkeni, Keńes qarııa men Ulbolsyn ájeniń shejireli eńbek jolynan, táliminen úlgi alǵysy keletin jas temirjolshylar bul áýletke jıi keledi. Olarǵa ardager temirjolshylar ónegeli ómirlerinen syr shertip, aqyl-keńesin berýden esh jalyqqan emes.
Aıtqandaı, bıyl Aımurzaevtar áýleti «Mereıli otbasy» ulttyq konkýrsynyń oblystyq kezeńinde birinshi júldege ıe boldy. Endi olar Maqat aýdanynda turatyn Qanatbaevtar áýletimen birge respýblıkalyq konkýrsqa qatysýǵa ázirlenýde.
Joldasbek ShО́PEǴUL,
«Egemen Qazaqstan».
Atyraý oblysy.