ASTANA. 17 mamyr. Búgin tańerteń AQSh-ta jergilikti boksshy kishi Vıllı Monromen shaıqasta orta salmaqtaǵy WBA (Super), IBO jáne WBC (Interim) nusqalary boıynsha álem chempıondyǵy ataǵyn qorǵaǵan jerlesimiz Gennadıı Golovkın 6-raýndta jeńiske jetti. Bul týraly egemen.kz habarlady.
Jekpe-jek Amerıkanyń Kalıfornııa shtatyndaǵy Inglvýd qalasynyń «Forým» arenasynda ótti. Gennadıı Golovkın ádettegideı urystyń basynan alǵa umtylyp, ózin joıqyn shabýyldaryn qolǵa aldy. Ol aıqastyń basynda-aq kishi Monrony teńseltip jiberetindeı shalt ta qatty soqqylar berip tastady. Al ekinshi raýndta bizdiń jerlesimiz qarsylasyn tipti eki ret nokdaýnǵa jiberip úlgerdi. Biraq amerıkalyq boksshy gong soǵylǵanǵa deıin ornynan turyp ketti.
Úshinshi raýndta Gennadııdiń eptep qarqyny basylyp qalǵandaı bolyp kórindi. Muny osy kezge deıin biraz esesi ketip qalǵan Vıllı jaqsy paıdalanyp qaldy. Onyń osy sáttegi birneshe shabýyly sátti shyqty. Budan keıingi tórtinshi jáne besinshi raýndtar da osy sıpatpen ótti. Osy tustarda qazaqstandyq jankúıerlerdiń kóńilderi eptep qobaljyǵandaı da boldy. Gena shaıqastyń osy kezeńderinde qarsylasyna birneshe ret qaýyrt soqqylar bere aldy. Alaıda, onyń qarymta soqqylar jasaýyna da jol berip qoıdy.
Osy alma-kezek shabýylmen altynshy raýnd ta kelip jetti. Oǵan bizdiń baǵlan birden qarqyndy kiristi. Kenet onyń taǵy bir oqys soqqysy Monroǵa dál tıip, murttaı ushyryp túsirdi. Osydan keıin alańdaǵy arbıtr saýsaqtaryn búgip sanaı bastady. Amerıkalyq atlet tóoeshiniń «on» degen sandy aıtýymen birge ornynan da turdy. Biraq referı budan keıin aıqasty jalǵastyrý múmkin emes dep tapty. Tehnıkalyq nokaýt! Osylaısha Gennadıı Golovkın kásipqoılar rıngindegi kezekti jeńisine jetti.
Osymen óziniń 33 jastaǵy Qaraǵandy qabylany 2015 jylǵy – ekinshi, jalpy sany 33-shi utysyna aıaq artty. Ol bulardyń 30-yn nokaýtpen aıaqtasa, solardyń sońǵy 20-syna osylaısha merziminen buryn qol jetkizip otyr. Al 28 jastaǵy kishi Vıllı Monro óziniń kásipqoılar rıngindegi 21 shaıqasynyń ekinshisinde jeńilistiń ashy dámin tatyp qaldy.
Aıta ketý kerek, Monro urystan 30 jáne 7 kún buryn ótkizilgen salmaq ólsheý kezinde urysqa WBC erejeleri boıynsha qatyspaıtynyn aldyn ala aıtqan edi. Sondyqtan WBC chempıondyǵy ataǵy bul joly báske qosylǵan joq. Al shaıqas aldyndaǵy resmı salmaq ólsheý prosedýrasynda Golovkın - 72,12 kg (159 fýnt), al Monro 72,57 kg (160 fýt) tartty. Urys kezinde qazaqstandyqtyń salmaǵy - 77,1 kılo (170 fýnt), amerıkalyq 78 kılo (172 fýt) boldy.
Rýslan Igilik.
Derek: egemen.kz
Sýret: Vesti.kz.