Golovkın temir Taısondy taǵynan taıdyrdy
О́tken jeksenbi kúni tańerteń qazaqstandyq kásipqoı boksshy AQSh-ta óziniń 33-shi jekpe-jegin ótkizip, taǵy da merziminen buryn jeńiske jetti. Ol bul joly amerıkalyq bylǵary qolǵap sheberi kishi Vıllı Monromen WBA (Super), IBO jáne WBC (Interim) nusqalary boıynsha orta salmaqtaǵy álem chempıony ataǵy úshin shaıqasty 6-raýndta aıaqtady. Bizdiń baǵlan osy arqyly ataqty Maık Taısonnyń taǵy bir rekordyna ózgeris engizdi.
Jekpe-jek Amerıkanyń Kalıfornııa shtatyndaǵy Inglvýd qalasynyń «Forým» sport arenasynda ótti. Gennadıı Golovkın ádettegideı urystyń basynan alǵa umtylyp, qaýyrt shabýylǵa kóshti. Ol aıqastyń basynda-aq Monrony teńseltip jiberetindeı birneshe joıqyn soqqylar berip tastady. Al ekinshi raýndta bizdiń jerlesimiz qarsylasyn tipti eki ret nokdaýnǵa da jóneltip úlgerdi. Biraq amerıkalyq boksshy gong soǵylǵanǵa deıin ornynan turyp ketti. Úshinshi raýndta Gennadııdiń eptep qarqyny basylyp qalǵandaı bolyp kórindi. Muny osy kezge deıin biraz esesi ketip qalǵan Vıllı jaqsy paıdalandy. Onyń osy bóliktegi birneshe qarsy shabýyly sátti shyqty. Budan keıingi tórtinshi jáne besinshi raýndtar da osyndaı sıpatpen ótti. Osy tustarda qazaqstandyq jankúıerlerdiń kóńilderi eptep qobaljyǵandaı da boldy. Gena qarsylasyna birneshe ret aýyr soqqy bergenimen, básekelesiniń qarymta judyryq silteýine de jol berip qoıdy. Serik PIRNAZAR, «Egemen Qazaqstan».