Qan maıdanda bolǵan soǵys ardagerleriniń qatary sırep keledi. Sol sırekterdiń biri toqsannan assa da jady myqty, kórgen-túıgeni mol Almat Ermaǵambetov aqsaqalmen óz otbasynda kezdesýdiń sáti tústi. Almat aǵa til-kózimiz tasqa, qur atqa mingendeı qýnaq kórindi, áńgimesi túzý.
Ol Hromtaý aýdanynyń Mamyt aýylynda dúnıe esigin ashyp, osynda jeti jyldyq mektepti bitirgen. Endi ǵana eńbekke aralasam ba degende Uly Otan soǵysy bastalyp ketedi. El azamattary birinen – keıin biri maıdanǵa ketip jatady. Sóıtip júrgende, 1943 jyldyń qańtarynda oǵan da kezek keledi. Orynborda jas jaýynger daıarlyqtan ótip, jańadan jasaqtalǵan áskerı bólimmen 4-shi Ýkraına maıdanynan bir-aq shyǵady. №273 atqyshtar polki avtomatshylar bólimshesiniń komandıri, serjant Almat Ermaǵambetov Lvov túbinde alǵash ret urysqa kirip, oq-dáriniń ıisin sezinip, jarylǵan snarıad pen boraǵan oqqa boıyn bekitedi. Osylaı maıdan joly ilgerileı beredi. Batys Ýkraınadaǵy qan-qasap urystarǵa qatysady, Polshaǵa jetedi. Ordasyna jaqyndaǵan saıyn nemister qatty qarsylyq kórsetedi. Alaıda, jaýdyń betin qaıtaryp, túre qýyp kele jatqan keńes áskeri qoısyn ba, fashısterdi tyqsyra túsedi. Bul kezde ot pen sýdan ótken saqa soldat Gdanskini, Krakovty, Osvensımdi jaýdan bosatýda da aldyńǵy shepte bolady. Jan alyp-jan berisken qandy shaıqastardyń birinde jaýyrynan aýyr jaraqat alǵan Almat Ermaǵambetov Ýfada gospıtalda jatyp emdeledi. Taıaq tastam jerde turǵan týǵan elge degen saǵynyshyn sabyrǵa jeńdirip, saýyǵyp shyqqan soń qaıtadan óz áskerı bólimine qosylady. Kenıgsberg qalasyn azat etýge qatysyp, Uly Jeńisti Germanııada qarsy alady.
Soǵys aıaqtalǵanymen Almat Ermaǵambetovti birden elge bosata qoımaıdy. Ol qyzmet etetin polkty Lıtvaǵa jiberedi. Sonda 1946 jyldyń kóktemine deıin Shaýlıaı qalasynda turady.
Áskerden bosaǵan ol elge qustaı ushady. Týǵan topyraǵyna tabany tıisimen birden jumysqa kirisedi. Beıbit eńbektiń qadirin biletin maıdanger qıraǵan sharýashylyqty qalpyna keltirýge atsalysty. Osy jerden qudaı qosqan qosaǵy Sara apaıdy kezdestirip, úılendi. Qazir ekeýiniń otaý qurǵandaryna 66 jyldyń júzi boldy. Isha despeı tatý-tátti ómir súrip keledi. Shúkir, ekeýiniń baýyrynan órgen 10 baladan 30 nemere, 13 shóbere súıip otyr.
Almat Ermaǵambetov kóp jyldar boıy Qyzyl sý aýylynda esepshi bolyp eńbek etti. 1985 jyly qurmetti eńbek demalysyna shyqty. Qazir oblys ortalyǵynda turatyn qart jaýynger týǵan aýylynda da qurmetti. Aýylmen qatynasy, barys-kelisi qalypty.
Almat aǵa Uly Otan soǵysynyń ardagerleri qatarynda Astanada ótetin Uly Jeńistiń 70 jyldyǵyna arnalǵan áskerı paradqa qatysty. Mundaı qurmetke Uly Jeńistiń 65 jyldyǵynda da ıe bolǵan eken. Toqsannan assa da qýatty Almat aǵa teledıdar qaraıdy, gazet oqıdy. Elde bolyp jatqan jańalyqtardan qulaǵdar qart osyndaı jaqsy jaǵdaı jasap otyrǵan Elbasyna, jergilikti bılikke dán rıza.
– Álem tynyshsyz, kóp elderde daǵdarys dendep barady. Bizdiń elimizdi ekonomıkalyq qýatty, saıası turaqty, ózara birligi berik etip ustap kele jatqan Memleket basshysy Nursultan Nazarbaevqa rahmet, – deıdi aqsaqal.
Satybaldy SÁÝIRBAI, «Egemen Qazaqstan».
Aqtóbe oblysy.