PETROPAVL. 5 naýryz. Petropavldaǵy M.Qozybaev atyndaǵy Soltústik Qazaqstan memlekettik ýnıversıtetinde «QR Konstıtýsııasy jáne onyń quqyqtyq negizderi» degen taqyrypta konferensııa ótti. Joǵary oqý oryndary stýdentteriniń arasynda ótken sharaǵa elimizdiń ár óńirinen 30-dan astam irgeli bilim ordasy qatysty. Bul týraly ýnıversıtettiń baspasóz ortalyǵy habarlady.
Konferensııa aldynda mártebeli qonaqtar ǵylymı jobalar kórmesin tamashalap, stýdentterdiń ozyq oıly ıdeıalary jáne zertteý jumystarymen tanysty.
Jıynǵa qatysýshylardy oblys ákiminiń orynbasary Erlan Áýkenov quttyqtap, Qazaqstandaǵy demokratııalyq qoǵamnyń damýynda Ata Zańnyń alatyn orny men mańyzyn aıtyp ótti.
Elimizdiń Bilim jáne ǵylym mınıstrligi jastar saıasaty departamenti dırektorynyń orynbasary Erkin Úısinbaev, S.Amanjolov atyndaǵy Shyǵys Qazaqstan ýnıversıtetiniń stýdenti Nazerke Toqtarbaeva, Aqtóbe memlekettik ýnıversıtetiniń stýdenti Gúlsezim Jaquda, S.Toraıǵyrov atyndaǵy Pavlodar memlekettik ýnıversıtetiniń stýdenti Ashat Tileýlenov jáne taǵy basqa qatysýshylar sóz alyp, Konstıtýsııanyń quqyqtyq negizderi, jastardyń el órkendeýine qosyp otyrǵan úlesi, alda turǵan irgeli mindetter, Joldaý qaǵıdattaryn oryndaýda júkteletin bıik talaptar jaıly áńgimeledi. Sonymen qatar, jıyn barysynda jergilikti jerlerdegi máseleler, olardy sheshý joldary talqylandy. Birneshe kúnge sozylǵan konferensııada 600-ge jýyq baıandama tyńdalyp, ártúrli taqyrypty qamtyǵan seksııalyq jumystar júrgizildi.
О́mir Esqalı.
Derek: Soltústik Qazaqstan memlekettik ýnıversıtetiniń baspasóz ortalyǵy.
Sýret: nkzu.kz.