QARAǴANDY. 5 naýryz. Búgin Qaraǵandy oblystyq aýdanaralyq mamandandyrylǵan qylmystyq ister soty kisi óltirýge áreket jasaǵan Qarqaraly aýdany burynǵy ákiminiń uly men onyń dosynyń sońǵy sózin tyńdady. Bul týraly egemen.kz habarlady.
Sot aldyna kelgen burynǵy ákimniń balasy Narıman Batyrbekov pen onyń dosy Qaırat Ordashevqa kisi óltirýge áreket jasady degen aıyp taǵylyp otyr.
О́tken jylǵy 29 qazan kúni olar maı quıý beketinde stýdent Sanat Hasenovti jabylyp soqqyǵa jyǵady. Domkratmen basynan urǵannan keıin esinen tanyp qalǵan jigitti «óldige» sanaǵan eki dos ony ózderiniń «VAZ» kóliginiń júk salǵyshyna salyp alyp, ormanǵa áketedi. Sol jaqta stýdenttiń ústinen kıimderin sheship alyp, ózin aıdalaǵa qaldyryp ketedi. Osynda jigittiń kóligi men kıimderin órteıdi.
Biraq arada biraz ýaqyt ótkennen keıin Sanat esin jınaıdy. Ústinde eshqandaı kıimi joqtyǵyna, kúnniń sýyqtyǵyna, jerdiń qar basyp jatqanyna qaramastan, jas jigit bir kezde orman shetindegi joldy da taýyp alady. Oǵan kólik toqtatyp, minýdiń oraıy keledi Munyń jaıyna qanyqqan júrgizýshi birden aýrýhanaǵa tartady.
Atalǵan qylmysty jasaýǵa aýdan ákimi ulynyń qatysy bar ekeni kóp uzamaı belgili bolyp qalady. Osy janjaldan keıin Narımannyń ákesi Nurlan Batyrbekov aldymen eńbek demalysyn alady, artynan jumystan da shyǵady.
Aqyrynda Batyrbekov pen Ordashevtiń sot aldynda jaýap beretin kezi de keldi. Olardyń ekeýi de jasaǵan qylmystaryn moıyndady. Kelesi aptada bul iske de núkte qoıylady.
Prokýror aıyptalýshylardyń árbirin 11 jyldan bas bostandyqtarynan aıyrýdy surap otyr. Al sottalýshylar búgingi sońǵy sózderinde ózderine jeńildik berýdi ótindi. Burynǵy ákimniń balasy tipti zardap shegýshi men óziniń ata-anasynan keshirim suraǵan kezinde kózine jas ta aldy.
«Meniń oıymda Sanatty óltirý bolǵan joq, - dedi Narıman Batyrbekov. – Shynyn aıtsam, ornyna kelmes nárse jasap alǵanymdy bilgenimde, qatty qorqyp kettim. Osynyń bárin birden áke-shesheme aıtýym kerek edi. Men sasyp qaldym. Endi jasaǵan jaǵymsyz tirlikterim úshin Sanattyń ata-anasynan, ózimniń áke-sheshemnen keshirim suraǵym keledi».
Qaırat Ordashev te keshirim surap, zábir kórgen jigittiń ata-anasyna birneshe ret basyn ıdi.
«Meni adamsha túsinińizder, sen eshqashan mundaıdy jasaǵan emespin, alda da jasamaımyn, - dedi Qaırat Ordashev. – Men Sanatty tanymaımyn, ony kim ekenin, qaıdan ekenin bilmeımin. Meniń onymen buryn kıkiljińim bolǵan emes. Men birden quqyq qorǵaý organdaryna barýym kerek edi, biraq qorqyp qaldym».
Atalmysh is boıynsha úkim 10 naýryz kúni shyǵarylady.
Aıqyn Nesipbaı.
Derek, sýret: egemegen.kz.