Baıaǵyda aýylǵa barsań, úı saıyn aldyńnan altyn alqa taqqan analar shyǵatyn. Bir úıdiń tórinde 7-8 bala qatar asyr salyp, úlkenine syımaı qalǵan kástómdi ortanshysy kıip, keń shalbardyń balaǵyn qaıyryp alǵan kenjesi aıaǵyna ilip eptesip-septesip ósýshi edi. Kópbalaly otbasy shetinen eńbekqor, pysyq, qanaǵatshyl, namysshyl bop keledi. Qaıta bir-eki balamen shektelgen jubaılarǵa el ol kezde osqyryna qaraıtyn. «Qudaı bermeı jatqan shyǵar, áıtpese jas qoı, táıiri...» dep syrtynan músirkep jatatyn.
Biz áńgime etkeli otyrǵan Raıkúl apaǵa Alla taǵalam qursaǵyna berekesin erekshe darytyp turǵan sol bir jyldary bes márte qursaq kóteripti. Bes balany ol jyldary kim tappady deıtin shyǵarsyzdar. Biraq, Raıkúl apanyń jóni bólek. Beseýdiń úsheýinde egiz balalardy dúnıege ákelipti. Tula boıy tuńǵyshy Gúljanyn bosanǵannan keıin araǵa eki jyl salyp, Nurlany ińgálady. Sosyn aralaryna eki-úsh jyl salyp, úsh egiz birinen keıin biri jaryq dúnıe esigin ashty. Aldymen Asan men Úsen, sosyn Erjan men Nurjan, sońynan Elmıra men Gúlmıra... О́kinishtisi, Gúlmırasy 6 aılyǵynda shetinep ketti.
Búginde Tursynqul aǵa men Raıkúl apadan taraǵan perzentterdiń bári otbasyly, uldary úılenip, qyzdary turmys quryp, bir-bir otbasynyń ıesi bolyp otyr.
– Aýylda úlken balam Nurlannyń qolynda turamyn, – deıdi Raıkúl apa aǵynan jarylyp. – Allaǵa myń márte shúkirshilik, 26 nemerem, 2 shóberem bar. Shalym byltyr qaıtys boldy. О́mir boıy keńsharda shopyr bolyp jumys istep edi. Segiz bala týdym eken dep jumystan qol úzgenim joq. О́zim osy aýyldaǵy taýyq fermasynda eńbek ettim. Eńbegimizdi elegeni bolar sol jyldary depýtat ta bolyp saılandym. «Eńbek ardageri» medalimen de marapattaldym. Sol jumysymnan zeınetkerlikke shyqtym. Elbasy Nursultan Nazarbaevqa aıtar alǵysym zor. Elimiz aman, jurt tynysh. Osynaý beıbit zamanda ul-qyzdarymnyń bári eńbek etip, nesibesin terip, yntymaǵy jarasqan otbasy boldy. Elbasynyń Jarlyǵy boıynsha 2010 jyly «Altyn alqaǵa» ıe boldym. Bala-shaǵa, nemere-shóbereler jıi kep, jaǵdaıymdy surap turady. Úsh nemerem turmys qurdy. Nemerelerimniń birazy joǵary oqý oryndarynda oqyp jatyr. Kelinderime «Men otyz jasqa deıin bala týdym. Sosyn jumys istedim. Eger qyryq jasqa deıin týǵanymda bala-shaǵanyń kóptiginen búginde mılaryń ashyp keter edi. Ár balanyń óz nesibesi bar. Sondyqtan bala týý máselesin shektemeńder, aınalaıyndar» dep, únemi aqylymdy aıtyp otyramyn. Qazir de el ishinde «Altyn alqa» taqqan analar az emes qoı. Halyq sany jyldan-jylǵa ósip keledi. Aıtpaqshy, egizderdiń tuqym qýalaıtyny ras eken. Úlken qyzym Gúljan da bir ul, bir qyzdy egiz bosanyp, esimderin Arýjan, Baýyrjan dep qoıdy. Qazir ekeýi eseıip, Almatyda bank salasynda qyzmet etip júr.
Bir qyzyǵy, Raıkúl apanyń balalary shetinen «soldat». Iаǵnı, Qazaqstan Qarýly Kúshterinde qyzmet etedi. Nurlany jubaıymen Taraz qalasyndaǵy áskerı bólimshede jumys isteıdi. Erjany da áskerde tehnıka jaǵynan maman. Asan men Úsenniń de ústerinde áskerı kıim. Olar da osy salanyń qyzmetkerleri. Nurjany da kúni keshege deıin áskerı bólimde jumys istep, sońǵy kezderi ǵana basqa salaǵa aýysypty. Al, Elmıra balabaqshada tárbıeshi, Gúljan úı sharýasynda.
«Bes balanyń anasyn «janym» deseń bolmaı ma, on balanyń anasyn «hanym» deseń bolmaı ma?» dep aqyn jyrlaǵandaı, shynynda segiz balany dúnıege ákep, jeteýin ósirip-tárbıelep, jetkizgen Raıkúldeı analar kez kelgen qurmetke laıyq. Prezıdentimiz N. Nazarbaev «Otbasy – óte uly qundylyq. Myńjyldyqtar men ǵasyrlardan beri otbasy árbir qoǵamnyń urpaqtan-urpaqqa jalǵasqan moraldyq salttardyń, ulttyq dástúrlerdiń saqtaýshysy bolyp tabylady» dep, shaǵyn shańyraqtyń da el birligine qosar úlesi zor ekenin, ata-analardyń júrgizip jatqan otbasylyq tárbıe men táliminiń róli erekshe ekenin basa aıtty. Rasynda otbasy – tárbıe mektebi. Urpaqtyń zııaly bolyp ósýinde ata men ananyń alatyn orny erekshe. Allaǵa shúkirshilik, Raıkúl apa búginde beınetiniń zeınetin kórip, baldaı tátti nemere-shóberelerine tálimdi tárbıe berýden jalyqqan emes.
Oralhan DÁÝIT,
«Egemen Qazaqstan».
Jambyl oblysy,
Baızaq aýdany,
Kóktal aýyly.