ASTANA. 2 shilde. Qyzylorda óńirinde aýa temperatýrasy (kóleńke jerde) +42 gradýstan joǵary bolyp tur. Sondaı-aq, «Qazgıdromet» mamandary 29 maýsym men 2 shilde aralyǵynda sıklon ótetinin aıtýda. Bul týraly egemen.kz habarlady.
«Qazgıdromet» RMK qyzmetiniń deregine súıensek, Qyzylorda aımaǵynda kúnniń tikeleı jerge túsýi 68-75 gradýs nólden joǵary. Al kóleńke jerdegi aýa temperatýrasy +42 gradýstan joǵary. Sondaı-aq, mamandar bıylǵy jazdyń erekshe ystyq bolatynyn alǵa tartyp otyr. Osyǵan oraı sınoptıkter turǵyndardy aptap ystyqta dalaǵa shyqpaı, reti kelse salqyn jerde demalǵandy durys sanap, eskertý jasaýda.
Degenmen, taıaý kúnderi elimizdiń birqatar aımaqtarynda daýyl turyp, burshaq urady. Sınoptıkter 4 shildege deıingi aýa raıy boljamyn jarııalady.
«Qazgıdromettiń» málimetinshe, joǵary barııli jyramen baılanysty sýyq atmosferalyq fronttar Qazaqstannyń batysynan shyǵys baǵytyna aýysady. Osy fronttarǵa baılanysty naızaǵaıly ótkinshi jańbyr, burshaq jáne daýyldy jel bolady.
«Jaqyn aradaǵy úsh táýlikte fronttyń shyǵysqa jyljý shamasyna qaraı, barlyq meteorologııalyq qubylystar respýblıkanyń batys, soltústik, ortalyq jáne shyǵys oblystarynda bolady dep kútilip otyr. Sonymen qatar, osy frontpen Qazaqstan aýmaǵynyń kóp bóliginde aýa temperatýrasy tómendeıdi», – dedi mamandar.
Eske sala keteıik, buǵan deıin sınoptıkter Qazaqstanda shilde aıynyń aýa raıy qandaı bolatynyn jarııalaǵan edi. Olardyń aıtýlarynsha, respýblıkada shildeniń birinshi onkúndiginde aýa raıy salqyn, jeldi ári jańbyrly bolady dep kútilip otyr. Al eń salqyn kúnder aldaǵy demalysqa sáıkes keledi.
Talǵat Raıymbek.
Derek: egemen.kz.
Sýret: today.kz.