Baılanystardy bekite túsýdegi tyń qadamdar

  Keshe Memleket basshysy Nursultan Nazarbaev elimizge  resmı saparmen kelgen Pákistan Islam Respýblıkasynyń Premer-mınıstri Navaz Sharıfpen kezdesti. Kezdesýde saýda-ekonomıka­lyq, kólik-tranzıttik, ǵylymı-tehnıkalyq jáne mádenı-gý­ma­nıtarlyq salalardaǵy eki­jaqty yntymaqtastyqty ny­ǵaıtý máseleleri talqylandy. So­ny­men qatar, halyqaralyq kún tártibindegi ózekti jaıttar sóz boldy. Kezdesý barysynda Qazaqstan Prezıdenti Pákistannyń júıeli damýyndaǵy Navaz Sharıftiń atqarǵan rólin atap kórsetti. «Siz kúrdeli jaǵdaıda elde ekonomıkalyq jáne saıası reformalardy tabysty iske asyryp, Pákistannyń bedeli men rólin kóteretin belsendi halyqaralyq saıasat júrgizip otyrsyz. Qazaqstan men Pákistan ornalasqan óńirdiń elderi ózara saýda jáne mádenı qarym-qatynastar turǵysynan árdaıym tyǵyz baılanysta boldy. Ilgeride Siz bizdiń burynǵy astanamyz Almatyǵa kelgen bolatynsyz. Sodan bergi az ýaqyt ishinde biz jańa elorda saldyq, ony búkil qazaqstandyqtar maqtan tutady. Bul qala – bizdiń táýelsizdigimiz ben elimiz egemendik jyldarynda jetken jetistikterdiń sımvoly», dedi Memleket basshysy. Al N.Sharıf óz kezeginde Nur­sultan Nazarbaevqa shaqyrtýy úshin alǵys aıtyp, eki halyqtyń baı­lanystarynyń  san ǵasyrlyq tarıhy bar ekenin atap ótti. «Men Sizdiń kóshbasshylyq qasıetińizge tántimin jáne Sizdi erekshe qabilet ıesi dep esepteımin. Búginde Astanadan bizdiń kóretinderimizdiń bári – Sizdiń eńbegińiz», dedi Pákistan Premer-mınıstri. Ekijaqty kezdesýden soń Qazaqstan Prezıdenti men Pákistan Premer-mınıstri keńeıtilgen quramda ótken kelissózderge qatysty. Onda  Qazaqstan Prezıdenti óz sózinde Navaz Sharıftiń sapary ekijaqty qarym-qatynasty jandandyrýǵa tyń serpin beretinine senim bildirdi. «Qazaqstandyqtar elimizdiń táýelsizdigin alǵashqylardyń biri bolyp Pákistannyń tany­ǵa­nyn eshqashan umytpaıdy. Halyq­aralyq kún tártibine qatysty ustanymdarymyzdyń uqsastyǵy, san ǵasyrlyq dostyq jáne mádenı  baılanystar bizdi jaqyn ári baýyrlas elderge aınaldyrady. Búgingi ahýal jaǵdaıynda qarym-qatynastarymyzdyń jańa kezeńin bastaý úshin barlyq múmkindikti paıdalanatyn ýaqyt jetti. Sizdiń saparyńyz dál osy maqsatqa saı keletinine senimdimin», dedi Memleket basshysy. Pákistan Premer-mınıstri bizdiń elge degen aıryqsha kóńili men Nursultan Nazarbaevpen aradaǵy jyly qarym-qatynasy týraly aıtty. «Men Qazaqstandy ózimniń ekinshi mekenim sanaımyn, sondyqtan Sizdiń elge kóp jyldan keıingi saparym aıryqsha áserge bóledi. Osy múmkindikti paıdalana otyryp, Sizdi ózińizge qolaıly ýaqytta Pákistanǵa kelýge shaqy­ra­myn. Bul – meniń Astanaǵa bi­rin­shi kelýim. Bul qala Sizdiń kó­regendigińizdiń sımvoly dep sanaı­myn. Sizdiń basshylyǵyńyzben Qazaqstan zor áleýmettik-ekono­mıkalyq jetistikterge jetti,  de­di N.Sharıf. Ol sondaı-aq, Pá­­kis­tannyń Qazaqstanmen jáne Ortalyq Azııa elderimen yntymaqtastyq aıasyn keńeıtkisi keletinin atap kórsetti. «Biz energetıka, saýda jáne ekonomıka, kólik salalaryn qosa qamtıtyn kóptegen salalarda qarym-qa­ty­­nasty damytqymyz keledi. Osyǵan baılanysty Qazaqstandy Qytaı-Pákistan kólik júıesiniń jumysyna atsalysýǵa shaqyramyz. Bul Sizdiń el jáne osy óńirdegi basqa da memleketter úshin Parsy shyǵanaǵyna shyǵýǵa jol ashady», dedi Pákistan Premer-mınıstri. Sonymen qatar, Navaz Sharıf  Nursultan Nazarbaevty, sondaı-aq, búkil Qazaqstan halqyn Qazaq handyǵynyń 550 jyldyǵymen jáne el Konstıtýsııasynyń 20 jyldyǵymen quttyqtady. Kelissózder nátıjesinde Qa­zaq­stan Respýblıkasynyń Pre­zıdenti men Pákistan Islam Res­­­pýblıkasy Premer-mı­nıstriniń birlesken málimdemesine qol qoıyldy. Sonymen qatar, Qazaqstan Respýblıkasynyń Qor­ǵanys mınıstrligi men Pákistan Islam Respýblıkasynyń Qor­ǵanys mınıstrligi arasyndaǵy Qazaqstan Respýblıkasy Qarýly Kúshteriniń áskerı qyzmetshilerin Pákistan Islam Respýblıkasy Qor­ǵanys mınıstrliginiń áskerı oqý oryndarynda oqytý tý­ra­­­ly kelisimge, Qazaqstan Res­pý­b­­lıkasynyń Syrtqy saýda palatasy men Pákistan Islam Res­­pýblıkasynyń Saýda jáne ónerkásiptik palatalary federasııasy arasyndaǵy birlesken Iskerlik keńesti qurý týraly ózara túsinistik memorandýmǵa qol qoıyldy. Kelissózder qorytyndysy bo­ıynsha Qazaqstan Prezıdenti men Pákistan Premer-mınıstri birlesken brıfıng ótkizdi. Brıfıngte Qazaqstan Prezı­denti kelissózder barysynda ekijaqty yntymaqtastyqtyń keń aýqymdaǵy máseleleri qozǵal­ǵanyn jáne óńirdiń ahýaly, so­nyń ishinde Aýǵanstan men Taıaý Shyǵystaǵy jaǵdaıdyń  tal­­qy­lanǵanyn atap ótti. Mem­le­ket basshysy kólik-tranzıt sa­­lasyndaǵy yqpaldastyqty da­mytýǵa aıryqsha kóńil bólin­genin, eki eldiń taýar aınalymy deńgeıin arttyrýdyń osyǵan baılanysty ekenin aıtty. «Qazaqstannyń «Nurly Jol» baǵdarlamasy men Qy­taıdyń «Jibek jolynyń eko­no­mıkalyq beldeýi» jáne Qa­ra­qo­rym joly memleketter arasyndaǵy yntymaqtastyqty jandandyrýǵa septigin tıgizedi dep sanaımyn. Sonymen birge, Qa­zaqstan-Túrikmenstan-Iran te­­­­mir­jo­ly Pákistannyń teńiz porttaryna shyǵýǵa jol ashady. Osy kólik baılanystary biz­ge saýda jáne ekonomıkalyq qarym-qatynastardy jaqsartýǵa múmkindik beredi, dedi Qazaqstan Prezıdenti. Nursultan Nazarbaev ónerkásipke, farmasevtıkaǵa, energetıkaǵa, áskerı-tehnıkalyq salaǵa, ǵylymǵa jáne basqa da mańyzdy baǵyttarǵa qatysty Qazaqstan men Pákistannyń naqty qadamdary týraly ýaǵdalastyqqa qol jetkizilgenin atap aıtty.  Son­daı-aq, aýyl sharýashylyǵy ónimderin óńdeý, hımııa jáne jeńil ónerkásip, bank sektory sııaqty salalarda yntymaqtastyqty jol­­ǵa qoıý maqsatynda Iskerlik keńes qurylǵanyna da toqtalyp ótti. Sonymen qosa, Pákistan N.Sharıftiń basshylyǵymen ekonomıkalyq ósim qarqynyn úde­tip, álemdik saıasattaǵy sal­maq­­ty orny bar elge aınalyp kele jatqanyn atap ótti. Nursultan Nazarbaev Azııadaǵy ózara is-qımyl jáne senim sharalary keńesin ótkizý,  EKSPO-2017 kórmesin ótkizý quqyǵy úshin daýys berý, Qazaqstannyń DSU-ǵa kirýi máselelerine qatysty bizdiń elimizdi Pákistannyń qoldaǵanyna jáne búgingi tańda Qazaqstannyń BUU Qaýipsizdik Keńesiniń turaqty emes músheligine kandıdatýrasyn da qoldap otyrǵanyna nazar aýdardy. Osyǵan oraı Memleket basshysy Pákistan tarapyna zor alǵys bildirdi. Pákistan Premer-mınıstri óz kezeginde jyly qabyldaý men qonaq­jaılylyq úshin taǵy da alǵys aıtyp, jańa elorda – Astana qalasy Qazaqstannyń ilgerileýi men órkendeýiniń sımvoly bolyp sanalatynyn atap ótti. «Meni Nursultan Nazarbaevtyń kemel basshylyǵynyń arqasynda Qazaqstannyń qol jetkizgen áleý­­mettik-ekonomıkalyq tabys­tarynyń aýqymy tánti etti. Biz elderińizge aldaǵy ýa­qytta da tabys pen baq-bereke tileı­miz. Bizdiń memleketterimizde qa­­rym-qatynas pen ózara yn­ty­maqtastyqty jaqsartýǵa qajetti zor áleýet bar,  dedi N.Sha­rıf. Ol sapar barysynda taraptar ekijaqty qarym-qatynastar men halyqaralyq kún tártibindegi keń aýqymdy má­se­lelerdi talqylaǵanyn aıtty. «Biz bilim jáne ǵylym, ekonomıka, kólik, keme qurylysy, sondaı-aq, áýe qatynasy salalaryndaǵy ózara yqpaldastyqty nyǵaıtýǵa kelistik. Qazaqstan munaıy men gazynyń ımportyna, jeńil ónerkásipte, aýyl sharýashylyǵynda, farma­sev­tıka jáne basqa salalarda bir­­lesken kásiporyndar ashýǵa qatysty ýaǵdalastyqtarǵa qol jet­kizildi»,  dedi Pákistan Islam Respýblıkasynyń Premer-mı­nıstri. N.Sharıf ekijaqty qatynas­tardaǵy ınstıtýttyq tetikterdi nyǵaıtý ıntegrasııalyq úderis­terge, búkil óńirdegi beıbitshilik pen turaqtylyqty saqtaýǵa oń yqpal etetinin aıtty. «Qazaqstan men Pákistan ShYU jáne BUU sııaqty halyqaralyq uıymdar aıasynda budan ári de yntymaqtasýǵa yqylas tanytyp otyr», dedi Pákistan Premer-mınıstri. Dınara BITIKOVA, «Egemen Qazaqstan». Sýretterdi túsirgender S.BONDARENKO, B.OTARBAEV.