Paı-paı! Wi-Fi-y bar tramvaı...

Aıtpaqshy, «Qazaqstan-Sibir 2011» halyqaralyq kórmesi kezinde «Varshavalyq tramvaı» kásiporny oblys ortalyǵyna jańa zaman tramvaılaryn jetkizedi. Ákimdik «Pesa Býdgosh» kompanııasy joldardy eýropalyq standarttarǵa saı jóndeıdi, «varshavalyq tramvaılarmen júresizder...» dep qatty qýantyp edi. Joǵary suranysqa ıe qoǵamdyq kólik 40 jyldan asa ýaqyt qala turǵyndaryna qyzmet etip keledi. Tramvaı basqarmasynda 115 tramvaı vagony bar bolsa, onyń 86-sy kúndelikti qozǵalys baǵyttaryna jiberilýde. Osy jýyrda oblys ortalyǵynda ótken kezdesýde «Eýrazııalyq top» JShS-i men oblys ákimdigi arasyndaǵy kelisim boıynsha jańadan 5 tramvaı satyp alýǵa qarjy bólinedi dep habarlandy. Buǵan deıin oblys ákimi Qanat Bozymbaevtyń elimizdiń Ulttyq ekonomıka mınıstrligi jáne «Eýropalyq qaıta qurý jáne damý bankiniń» ókilderimen kezdesýlerde de «Pavlodar qalasynyń tramvaı basqarmasy» AQ-ty jańǵyrtý máselesi taǵy da kezekti ret talqylandy. Iаǵnı, osy kelisimder arqyly oblys ortalyǵyna endi «zamanaýı ári Wi-Fi qondyrǵylary bar 50 tramvaı ákelinedi..» dep qýantady. Kelisimderde aıtylǵandaı, 50 bolmasa da, budan bir jyl buryn Reseıden eki-úsh jańa tramvaı keldi. Másele, tramvaıdyń qunynda. Bir vagon 70 mıllıon teńge tursa, zamanaýı tramvaılaryńyz odan da asyp túsýi múmkin. Al, tramvaı basqarmasy tramvaı parkin jańǵyrtý boıynsha quny 4,23 mlrd. teńge bolatyn joba jasap beripti. Oblys ortalyǵyndaǵy tramvaı parkiniń 90 paıyzy tozǵan, vagondardyń kópshiligi merzimderin eki ese ótegen deımiz. Biraq, tramvaı basqarmasy da qarap otyrǵan joq, turǵyndarǵa qyzmet kórsetý sapasyn arttyrý maqsatynda depo parkin modernızasııa­laý jumysyn qolǵa alýda. Arnaıy baǵdarlama boıynsha jańartylǵan tramvaılar zamanaýı jylytqysh quraldarymen jabdyqtalýda. Bir vagondy jóndeý úshin kásiporyn 8 mıllıon teńge jumsaıdy eken. Qazir tramvaı basqarmasynyń parkinde jarqyrǵan jańasyn ákelmek buryn parktegi 65 eski vagondy tolyqtaı jańartý, jańǵyrtý jumystary da júrgizilýde. Degenmen de, jolaýshylar úshin Varshavanyń tramvaıynyń da, Wi-Fi qondyrǵysynyń bolýy mańyzdy emes, mańyzdysy – jumysyna, baratyn jerine jetkizetin kóliktiń bolýynda jáne sapaly qyzmet. Máselen, ákimder kele jatyr dep jylda aıtylatyn 50 tramvaıdyń kelisimder iske asyp, /5-ýi jaqynda qosyldy/ qalamyzǵa jyldamyraq jetýinde ǵoı... Farıda BYQAI, «Egemen Qazaqstan». PAVLODAR.