Elbasynyń bastamasymen qurylǵan ashyq aspan astyndaǵy murajaı «Atameken» Qazaqstan kartasy» etno-memorıaldyq keshenindegi ǵajaıyp maketter Qyzylorda oblysy kartasynyń jańartylǵan nysandarymen tolyqty. Aımaqta qurylysy ózindik qalypqa enip, oǵan ómirsheńdik naqysh syılaǵan birqatar ǵımarattardyń maketteri osy jerden oryn tepti.
Mine, osyǵan baılanysty tanystyrý rásimi ótip, aıtýly sharaǵa Qyzylorda oblysy ákiminiń orynbasary men depýtattar, ardagerler, qala turǵyndary jáne buqaralyq aqparat quraldarynyń ókilderi qatysty. Búgingi tańda «Atameken» Qazaqstan kartasy» kesheni elorda turǵyndary men qonaqtarynyń eń kóp keletin mádenı oryndarynyń birine aınaldy. О́ıtkeni, ol elimizdiń mádenı-áleýmettik jáne óndiristik obektilerin, florasy men faýnasyn, landshaftyn beıneleıtin álemdegi alǵashqy keshen bolyp sanalady. Respýblıkamyzdaǵy 14 oblystyń, Astana jáne Almaty qalalarynyń ótkeni men búgingi tynysynan syr shertetin qundy muralar men tarıhı oryndardyń jańa úlgileri de jyl saıyn keshen qoryn baıyta túsýde. Sondyqtan da, qalanyń, eldiń, halyqtyń tarıhyn osylaısha kórsetý úshin Qyzylorda oblysy elordalyqtarǵa arnaıy kelipti.
Bul oraıda keshende Syr eliniń tamasha ǵımarattary tanystyrylyp, tarıhı-mádenı nysandary jan-jaqty kórsetildi. Is-shara barysynda alǵysózdi Qyzylorda oblysy ákiminiń orynbasary Raýan Kenjehanuly alyp, elorda halqyn kele jatqan merekemen quttyqtady. «Qyzylordalyqtar ózderin astanalyqtarǵa bir taban jaqyn sezinedi. Sebebi, elordalyq mádenıet, astanalyq rýh Syr óńirine de tán. Qazirgi Qyzylorda oblysynyń terrıtorııasy qazaq dalasynda dáýirlegen ejelgi memleketterdiń tý tigip, astana salǵan qasıetti topyraǵy. Onyń ishinde tarıhtar toǵysynda boı kótergen saq patshalarynyń kıeli ordasy – Shirikrabat, oǵyzdyń basy bolǵan – Jankent, altyn úzikti qazaqtyń alǵash baıraǵy tigilgen – Syǵanaq qalalary osy qasıetti topyraqta turǵyzylǵan. Al bertinde, XX ǵasyrdyń basynda Qyzylorda qalasy keńes ımperııasynyń quramyndaǵy qazaq eliniń birinshi astanasy bolǵan» degen ákimniń orynbasary Syr eli ǵaryshqa jol ashqan, Baıqońyrdaı aılaǵy bar tylsym meken bolyp tabylatyndyǵyn atap aıtty. Sonymen qatar, bul nysandar elordalyqtarǵa oblys jaıynda maǵlumat beretin oryn bolatyndyǵyna senim bildirdi. Kelesi kezekte sóz alǵan Astana qalasynyń máslıhat hatshysy Sansyzbaı Esilov osy keshendegi Syr óńiriniń ǵımarattary beınelengen maketterdi kórgende búkil oblys kóship kelgendeı áserde qalǵanyn jetkizdi. Aıtýly mereke qarsańynda jasalyp otyrǵan sharanyń maqsaty da aıryqsha jáne de laıyqty tartý bolady dep atap ótti.
Endigi kezde keshenge kelýshiler óńir kartasynda kórsetilgen Kókaral sý bógeti, «Qorqyt ata» memorıaldyq kesheni, «Baıqońyr» ǵarysh aılaǵy, Turmaǵambet Iztileýov kesenesi, Qaljan ahýn meshit-medresesi, Aıtbaı meshiti, Á.Tájibaev atyndaǵy Qyzylorda oblystyq ámbebap ǵylymı kitaphanasy, «Syr Ana» monýmenti, «Bastaý» bıznes ortalyǵy, ortaǵasyrlyq Syǵanaq qalasy, Syǵanaq meshiti, «Tólegetaı-Qylyshty» kesenesi, Batys Eýropa – Batys Qytaı avtodálizi, Qyzylorda oblysy ákimdiginiń ǵımaraty tárizdi nysandarmen tanysyp, tamashalaı alady.
Elmıra MÁTIBAEVA,
«Egemen Qazaqstan».