Qazaqstan Respýblıkasynyń Taıland Koroldigindegi elshisi Marat Esenbaev Taıland Energetıka mınıstri Narongchaı Akrasanımen kezdesip, energetıka jáne «jasyl» ekonomıka salasyndaǵy qazaq-taı yntymaqtastyǵynyń aǵymdaǵy jaǵdaıy men bolashaǵyn talqylady.
M.Esenbaev taı energetıka vedomstvosynyń basshysyn Qazaqstannyń qazirgi áleýmettik-ekonomıkalyq damýy, munaı-gaz salasyndaǵy, atom jáne kómir ónerkásibindegi jaǵdaıy, Qazaqstannyń «jasyl» ekonomıkaǵa kóshý jónindegi tujyrymdamasy, EKSPO-2017 halyqaralyq kórmesi týraly habardar etip, Elbasynyń Qazaqstan halqyna «Nurly Jol – bolashaqqa bastar jol» Joldaýynyń negizgi qaǵıdalarymen tanystyrdy.
N.Akrasanı Taıland úkimeti Qazaqstanmen ekijaqty qarym-qatynasty joǵary baǵalaıtynyn atap ótti. «RTT» taı energetıka alybynyń «Teńiz» ken ornynan munaı alý tájirıbesi bar. Qazirgi tańda «Qashaǵanda» 100-ge jýyq taılyq dánekerleýshi jáne qubyr men kabel tartatyn mamandar jumys isteıdi.
Taı mınıstri, sonymen qatar, seriktestiktiń jeke baǵyttary boıynsha qoldaǵy mol áleýet, ókinishke qaraı, qazir tolyǵymen qoldanylmaıdy dep moıyndady. Degenmen, Taılandtyń munaı izdeý men shyǵarý jónindegi «PTT Exploration and Production» kompanııasy Qazaqstannyń munaı-gaz ken oryndaryn zertteýge múddeli.
N.Akrasanı Taılandtyń EKSPO-2017 halyqaralyq kórmesine qatysýyna jáne eliniń balamaly energııa kózderi salasyndaǵy jetistikterin kórsetýge daıarlyǵyn atap ótti. Taılandtaǵy jańartylǵan jáne balamaly energııa kózderi jalpy tutynýdyń 6%-yn quraıdy. JEK damýynyń negizgi baǵyty – bıomassa.
Kezdesý qorytyndysy boıynsha taraptar Taıland pen Qazaqstan arasyndaǵy energetıkalyq yqpaldastyqty keńeıtý týraly ýaǵdalastyqqa qol jetkizip, eki el energetıka mınıstrlikteri arasyndaǵy ózara túsinistik týraly memorandýmǵa qol qoıý qajettigin atap ótti. Sonymen qatar, N.Akrasanı Qazaqstannyń Energetıka mınıstri V. Shkolnıktiń Taılandqa saparyn uıymdastyrýdy jáne energetıka men «jasyl» ekonomıka salasyndaǵy ekijaqty yntymaqtastyqtyń tájirıbelik qadamyn talqylaýdy usyndy.
«Egemen-aqparat».