Prezıdenttikke kandıdat Ábilǵazy Qusaıynov Soltústik Qazaqstan oblysy Qyzyljar aýdanyndaǵy «Molservıs» JShS ujymymen kezdesý ótkizdi. О́z sózinde Á.Qusaıynov jıynǵa qatysýshylardy saılaýaldy baǵdarlamasynyń negizgi baǵyttarymen tanystyrdy.
Á.Qusaıynovtyń aıtýynsha, birqatar álem elderinde ekonomıkany qarqyndy damytýǵa baǵyttalǵan jumystar qorshaǵan tabıǵı ortanyń múmkindikterin eskermeı, oǵan shamadan tys kúsh salyp jatyr. Tabıǵat qoınaýyn tıimsiz paıdalaný, tabıǵı ortanyń qaldyqtarmen lastanýy, gendik jáne bıologııalyq ártúrliliktiń azýy tabıǵı ortanyń, adamzat mekendegen aınalanyń quldyraýyna alyp kelýi múmkin.
Adamnyń óndiriske negizdelgen turmysynan týyndaǵan ozon qabatynyń buzylýy, álemdik muhıttardyń lastanýy, jer men onyń qunarly qabatynyń jutańdanýy, bıologııalyq ártúrliliktiń azyp-tozýy syndy qubylystar búgingi kúnniń ózekti máselesine aınaldy. Atmosferanyń shań-tozań jáne gazdy qaldyqtarmen lastanýy úlken alańdaýshylyq týdyrady. Olar mıneraldy otyn men bıomassanyń órtenýine, sondaı-aq, taý-ken, qurylys pen basqa da jerde júrgiziletin jumystarǵa baılanysty aýaǵa taralyp jatyr.
«Adam orny tolmaıtyn tabıǵı resýrstardy sheksiz tutyna otyryp, qalpyna keltirýge bolatyn qorlardyń qaıta tolysýyna kedergi jasaýda. Tabıǵı resýrstardyń qaıta qalpyna kelmeıtinin esten shyǵarmaǵan jón», dep atap ótti Á.Qusaıynov.
Prezıdenttikke kandıdattyń aıtýynsha, adamzat jyl saıyn ónerkásiptik óndiris kólemin ósirip, sonyń saldarynan ıgerilmegen tabıǵattyń tynysy tarylyp bara jatyr. Ádette, óndiris kezinde osy jerlerde turatyn halyqtyń múddesimen qatar, onda ósetin biregeı ósimdikter men sırek kezdesetin ańdardyń qaýipsizdigi eskerilmeı jatady. Búginde adam óz qolymen óziniń ómir súretin keńistigin shekteýde.
Oǵan qosa, Á.Qusaıynov ekologııalyq bilimniń mańyzdylyǵyna toqtaldy. «Jalpy bilim beretin mektepterde mindetti pán engize otyryp, ekologııa men onyń qaýipsizdigi týraly túsinik qalyptastyrý, sonymen qatar, turaqty ekologııalyq-aǵartýshylyq jumystar júrgizý ekologııalyq jáne ónerkásiptik qaýipsizdik týraly bilim berýdiń mańyzdy qadamdary bolyp tabylady», dep atap ótti Á.Qusaıynov.
Sonymen qatar, «Molservıs» JShS ujymynyń aldynda Á.Qusaıynovtyń aımaqtyq saılaýaldy shtabynyń jetekshisi Olga Klıshına da sóz sóıledi. O.Klıshınanyń aıtýynsha, adam álemdik ekojúıeniń bir bóligi ekenin esten shyǵarmaýy tıis. Ǵalamshardyń jarqyn bolashaǵy ár adamnyń tabıǵı resýrstar men janýarlar álemine degen sanaly áreketine táýeldi. Álemdik ekojúıeniń bir bólshegi retinde Qazaqstan da qorshaǵan ortanyń lastanýynan týyndaǵan problemalardy sezinip otyr. Sondyqtan óskeleń urpaq arasynda tabıǵatty aıalaýǵa úndeıtin nasıhat jumystaryn kúsheıtý kerek.
О́mir ESQALI,
«Egemen Qazaqstan».
Soltústik Qazaqstan oblysy.