ASTANA. 16 qazan. Elbasy TMD memleketteri basshylary keńesiniń shaǵyn quramda ótken otyrysyna qatysty. Bul týraly akorda.kz habarlady.
Is-sharaǵa sondaı-aq Ázerbaıjan, Armenııa, Belorýssııa, Qyrǵyzstan, Reseı, Tájikstan, О́zbekstan prezıdentteri, Túrikmenstan mınıstrler kabıneti tóraǵasynyń orynbasary men Moldova Respýblıkasynyń syrtqy ister jáne eýropalyq ıntegrasııa mınıstriniń orynbasary qatysty.
Otyrysty ashqan Qazaqstan Prezıdenti Keńeske qatysýshylar atynan A.Lýkashenkony ótken saılaýdaǵy jeńisimen, sondaı-aq A.Atambaevty Qyrǵyzstandaǵy parlamenttik saılaýdyń tabysty ótýimen quttyqtady.
Nursultan Nazarbaev Qazaqstan TMD qurylǵaly beri elderimizdiń arasynda kópjaqty yntymaqtastyqty jandandyrýdy, yntymaqtastyqtyń negizgi baǵyttary boıynsha ıntegrasııany tereńdete túsýdi jaqtaǵanyn jáne bul baǵytyn áli jalǵastyryp kele jatqanyn aıtty.
«TMD – burynǵy keńestik keńistiktegi 11 memleketti biriktiretin biregeı qurylym. Bizdiń óńirde oǵan balama joq. Biz bul jerde halyqaralyq saıasattyń eń mańyzdy jaıttary boıynsha senimdi aýanda pikir almasyp, kópjaqty yntymaqtastyǵymyzdyń kez kelgen máselesin talqylaı alamyz. Bizdiń búgingi is-sharamyz TMD-ny damytý isine óz úlesin qosatynyna senimdimin», – dedi Memleket basshysy.
Qazaqstan Prezıdenti sondaı-aq búgingi otyrystyń kún tártibi tyǵyz ekenin, 17 másele qaralatynyn atap ótti.
«Máselelerdiń eleýli bóligi qaýipsizdik jáne quqyq tártibin qamtamasyz etýge arnalǵan, halyqaralyq sharttar toptamasyna qol qoıý, baǵdarlamalyq qujattardy bekitý, sondaı-aq TMD-ǵa múshe memleketter basshylarynyń halyqaralyq terrorızmge qarsy kúreske jáne BUU 70 jyldyǵyna arnalǵan málimdemelerin qabyldaý josparlanǵan. Usynylǵan qujattardyń is júzinde zor máni bar jáne olardy qabyldaý elderimizdiń yntymaqtastyǵyn nyǵaıta túsýge yqpal etetin bolady», – dedi Elbasy.
Aıdar О́risbaev.
Derek: akorda.kz.
Sýret: egemen.kz.