Basshylyq ózgermek
KHDR aqparat agenttigi 28 qyrkúıekte eldiń bıligindegi Eńbek partııasy basshylyǵynyń májilisinde partııanyń jańa basshylyǵy saılanatynyn habarlady. Qısynǵa qaraǵanda, Kım Chen Ir ketetinge uqsaıdy. Áıtpese bulaı habarlap jatpas edi. Ornyn kim basady degende, ártúrli boljam aıtylady. Basym pikir – koreıler kóseminiń kishi uly 26 jasar Kım Chen Ýn. Biraq Kım Chen Irdiń jaqynda Qytaıǵa sapary kezinde muny Batystyń ósegi degeni bar. Kim biledi, bul jaı aldarqatqan sóz shyǵar.
Parlament taratylady
Moldavııanyń konstıtýsııalyq soty el parlamentin taratýǵa tolyq negiz bar dep sheshti. 2008 jyldan beri parlament el prezıdentin saılaı almaı álek. Ol úshin depýtattardyń besten úshinen artyǵy usynylǵan kandıdatty qoldaýy kerek. Oǵan qol jetpedi. Sonda el basshysynyń mindetin atqarýshy Mıhaı Gımpý prezıdentti qandaı jolmen saılaý jóninde referendým ótkizip edi, daýys berýge halyq az qatysqandyqtan, ol ókilettik ala almady. Endi jańa parlament saılaýy ótedi. Sonda bir partııa ne blok basym kópshilik mandatqa ıe bolmasa, bılik daǵdarysy ári qaraı sozyla bermek.
Lýkashenkonyń básekelesteri
Belorýssııadaǵy prezıdent saılaýynyń sulbasy aıqyndalyp keledi. Ortalyq saılaý komıssııasyna úmitkerlerden ótinish túse bastady. Kásipker Vladımır Probalskıı, aqyn Vladımır Neklıaev, sanıtarka Natalıa Starıkova jáne ekonomıst Vıktor Tereshenko el basshysy bolýǵa úmit etedi. Sondaı-aq biraz partııalardyń basshylary da óz kandıdatýralaryn usynbaq oılaryn bildirdi. Sarapshylardyń pikirinshe, jeke shaýyp osylardyń eshqaısysy prezıdent Aleksandr Lýkashenkoǵa naǵyz básekeles bola almaıdy.
Kýlov Kremlge kirdi
Qyrǵyzstandaǵy parlament saılaýy qarsańynda ondaǵy jetekshi partııalardyń basshylary tek óz elinde ǵana emes, syrttan da qoldaý izdep júr. “Ar-namys” partııasynyń kósemi, eks-premer Felıks Kýlov Máskeýge baryp, onda “Edınaıa Rossııa” partııasynyń basshylyǵymen kelissóz júrgizip, kelisimge qol qoıǵannan keıin, prezıdent Dmıtrıı Medvedevtiń qabyldaýynda da bolǵan. Prezıdent ákimshiliginde Kýlov partııasy jeńiske jetse, Qyrǵyzstan prezıdenttik bılikke qaıta oralady degen áńgime aıtylyp jatqan kórinedi. Kezinde qyrǵyzsha bilmeıdi dep synalǵan Kýlovtyń orysshyl qaıratker ekeni belgili. Onyń partııasynyń jeńiske jetýi de kúmándi.
Kórshińnen qoryq
Parsy shyǵanaǵyndaǵy biraz elder AQSh-tan qyrýar qarjyǵa qarý satyp alyp jatqan kórinedi. 123 mıllıard dollarlyq qarý saýdasy, sirá, buryn bola qoımaǵan shyǵar. Bul mańdaǵy elderdiń kópshiligi baı – munaıy kóp. Saýd Arabııasy 67 mıllıard dollarǵa saýda jasapty. Sarapshylardyń aıtýynsha, bul qarýlaný dúrmeginiń syry Iran jaǵynan bolady degen qaýipke qarsy shara eken.
Immıgranttarǵa qarsy
Shvedııa – joǵary damyǵan el. Ony uzaq merzimde bılikte bolǵan sosıal-demokratııalyq partııanyń júrgizgen saıasatynyń jemisi degen pikir qalyptasqan. Biraq, mine, sońǵy parlament saılaýynda ońshyl sentrıstik koalısııa jeńiske jetti. Ony jurt eldegi ımmıgrasııa jaǵdaıyna qatystyryp otyr. Sosıalıster kelimsekterge shekarany ashyp qoısa, sentrıster shekteý jón degendi aıtady. Qazir eldegi 9,4 mıllıon halyqtyń 14 paıyzy – ımmıgranttar, ıaǵnı 1 316 myń. Kóbi – kórshi Fınlıandııadan. Qalǵandary Iraktan, burynǵy Iýgoslavııadan jáne Polshadan kelgender.
Zeınetkerlikke asyǵady
Fransýzdar zeınetkerlik reformaǵa qarsy. Úkimettiń zeınetkerlikke 60 jastyń ornyna 62 jastan shyǵý jónindegi sheshimine qarsylyq bildirip, sherýge shyqqan halyqtyń sany kásipodaqtardyń aıtýynsha, 3 mıllıon, al úkimettiń málimeti boıynsha – 1 mıllıon. Qalaı bolǵanda da, elge odan orasan zor zııan kelip otyr. Iri qalalarda kólik toqtaǵan. Poıyz, ushaqtardyń ózinde jolaýshylar jartylaı ǵana tolǵan. Sóıtse de úkimettiń qarsylardyń talabyn oryndaı qoıýy qıyn. Tipti, joǵarylatyldy degen 62 jastyń ózi Eýropada ǵana emes, álemdegi eń tómengi zeınetkerlikke shyǵý jasynyń biri.
Ázirlegen Mamadııar JAQYP.