Memleket basshysy Nursultan Nazarbaev Premer-Mınıstr Kárim Másimovti qabyldady, dep habarlady Qazaqstan Respýblıkasy Prezıdentiniń baspasóz qyzmeti.
K.Másimov Prezıdentti Úkimettiń aǵymdaǵy jumysy jáne elimizdiń áleýmettik-ekonomıkalyq damýynyń qorytyndylary týraly habardar etti.
Premer-Mınıstr astyq jınaý naýqany is júzinde aıaqtalǵanyn baıandady. On úsh mıllıon tonnadan astam astyq jınaldy. Bul azyq-túlik qaýipsizdiginiń barlyq máselesin sheshýge múmkindik beredi. Qazaqstandaǵy astyqtyń qory 2011 jyldyń 1 qazanyna deıin jetkilikti.
– Eger kelesi jyly astyq túsimi tómen bolǵan jaǵdaıda da bizde barlyq oblystardy qazirgi bar baǵa boıynsha astyqpen qamtamasyz etý úshin qajetti qor bolady, – dep atap ótti K.Másimov.
Prezıdent Úkimettiń aldyna Qazaqstannyń barlyq óńirlerin astyqpen qamtamasyz etý jáne astyq jınaý naýqanyn ońtaıly merzimde aıaqtaý mindetin qoıdy.
– Qalyptasqan jaǵdaıdan qorytyndy shyǵarý mańyzdy. Osy rette, qýańshylyqta osyndaı astyq jınaý memlekettiń aýyl sharýashylyǵyna zor kómek bergendiginiń arqasynda múmkin boldy. Jańa tehnologııany keńinen qoldaný kerek. Aýyl sharýashylyǵyn jańa tehnıkamen jaraqtandyrý, ylǵaldy saqtaý tehnologııasyn qoldaný olardyń keleshegi zor ekenin kórsetti, – dedi Prezıdent.
Premer-Mınıstr astyq eksportyn retteý týraly baıan etti. Úkimet qazaqstandyq astyqty ótkizýge baılanysty barlyq máseleni pysyqtap shyqty.
K.Másimov Memleket basshysyn Qazaqstannyń údemeli ındýstrııalyq-ınnovasııalyq damýynyń memlekettik baǵdarlamasyn iske asyrý barysy týraly da habardar etti. Atap ótilgendeı, aǵymdaǵy jyly baǵdarlama aıasynda qazirdiń ózinde 72 iri joba tabysty jumys isteýde, al jyldyń aıaǵyna deıin taǵy 72 joba iske asatyn bolady.
– Barlyq 72 nysan Táýelsizdik kúni qarsańynda paıdalanýǵa beriletinine sendirgim keledi, – dep atap kórsetti Premer-Mınıstr.
Kezdesý barysynda shaǵyn jáne orta bıznesti damytý jónindegi is-sharalar týraly, quqyq qorǵaý organdaryndaǵy reformalar barysy da, sondaı-aq aldaǵy ýaqytta memlekettik qyzmettegi apparatty qysqartý týraly sóz boldy.
* * *
Memleket basshysy Nursultan Nazarbaev Memlekettik hatshy – Syrtqy ister mınıstri Qanat Saýdabaevty qabyldady, dep habarlady Qazaqstan Respýblıkasy Prezıdentiniń baspasóz qyzmeti.
Q.Saýdabaev Prezıdentti BUU Bas Assambleıasynyń jumysyna qatysýynyń qorytyndylary týraly habardar etti. Ol BUU Bas hatshysy Pan Gı Mýn BUU Bas Assambleıasynyń aıasyndaǵy eki iri sharada Nursultan Nazarbaevqa jahandyq qaýipsizdikti qamtamasyz etýge, álemde ıadrolyq qaýip-qaterdi tómendetýge qosqan zor úlesi úshin úlken alǵysy men rızashylyǵyn bildirgenin atap ótti. BUU Bas hatshysy jappaı qyryp-joıatyn qarý-jaraqty ázirleýmen aınalysatyn ıadrolyq memleketter men elderdi Qazaqstannan úlgi alýǵa shaqyrdy.
Sonymen qatar men Prezıdenttiń tapsyrmasy boıynsha birqatar memleketterdiń kóshbasshylaryna on bir jyldyq úzilisten keıin Astanada 1-2 jeltoqsanda ótetin EQYU-ǵa múshe memleketter basshylarynyń Sammıtine shaqyrýdy tapsyrdym. Shaqyrý alǵys sezimmen qabyldandy, eýropalyq elder kóshbasshylarynyń kópshiligi osy joǵary halyqaralyq forýmǵa ózderiniń qatysatyndyqtaryn qýattady. AQSh Prezıdenti Barak Obama bizdiń Memleketimizdiń basshysyna óziniń ıgi tilegin bildirip, bizdiń elderimiz arasyndaǵy strategııalyq áriptestikti odan ári nyǵaıtý jáne keńeıtý jolyn berik ustanatynyn jetkizdi, – dedi Q.Saýdabaev.
* * *
Memleket basshysy Nursultan Nazarbaev “Ar-Namys” (Qyrǵyz Respýblıkasy) saıası partııasynyń tóraǵasy Felıks Kýlovty qabyldady, dep habarlady Qazaqstan Respýblıkasy Prezıdentiniń baspasóz qyzmeti.
Kezdesý kezinde Qyrǵyzstandaǵy jaǵdaıdy turaqtandyrý máselesi jáne EQYU-nyń qaýipsizdikti nyǵaıtý salasyndaǵy róli talqylandy.
Kezdesý aıaqtalǵannan keıin jýrnalısterge arnalǵan brıfıngte F.Kýlov EQYU-nyń Is basyndaǵy tóraǵasynyń Qyrǵyzstandaǵy jaǵdaıdy retteýge qosqan mańyzdy úlesin aıta kelip, Qazaqstan Prezıdentiniń týystas respýblıkaǵa gýmanıtarlyq jáne ekonomıkalyq kómek kórsetýdegi rólin erekshe atap kórsetti.