ASTANA. 5 qańtar. Ispanııanyń áıgili «Real Madrıd» komandasy bas jattyqtyrýshylyqtan Rafael Benıtesti bosatyp, ornyna Zınedın Zıdandy taǵaıyndady. Bul týraly bbc.com saıtyna silteme jasaǵan egemen.kz tilshisi habarlady.
Komandanyń burynǵy jattyqtyrýshysy Rafael Benıtes dúısenbi kúni dırektorlar keńesimen kezdesý ótkizgen soń, óz ornynan ketti.
Arnaıy uıymdastyrylǵan baspasóz konferensııasynda klýb basshylyǵy ıspan mamanynyń maýsym basynda qoıylǵan mindetti tolyq oryndaı almaǵany úshin osyndaı qadamǵa barǵanyn málimdedi. Sondaı-aq, osy ýaqytqa deıin atqarǵan eńbegine alǵys aıtyp, aldaǵy ýaqytta tek sáttilikter tiledi.
Aıta keteıik, Zınedın Zıdan «Real Madrıd» komandasynda 2001-2006 jyldar aralyǵynda óner kórsetken. Al Fransııa quramasymen ol 1998 jyly álem chempıony atandy.
Fýtbolshylyq mansabyn aıaqtaǵan soń, madrıdtik ujymda 2009 jyldan beri qyzmet etip keledi. Atalǵan jyly komanda prezıdenti Florentıno Perestiń kómekshisi bolsa, kelesi jyly keńesshisi atandy. 2011 jyly birinshi komandanyń dırektory mindetin atqardy. Osydan soń, jattyqtyrýshylyqty qolǵa alǵan Fransııa eliniń týmasy 2012 jyly koroldik klýbtyń jastar komandasyn jattyqtyrdy. Keler jyly birinshi komandada Karlo Anchelottıdiń kómekshisi boldy. Italııa mamanymen bir jyl qyzmettes bolǵan soń, 2014 jyldan búginge deıin «Real Madrıd Kastılıanyń» bas jattyqtyrýshysy bolyp qyzmet atqardy.
Aıan Ábdýálı.
Derek, sýret: bbc.com.