Mine, Memleket basshysynyń ákelik qamqorlyǵyna saı azamattyq qyzmetkerlerdiń eńbekaqysy ósetin kúnge de jetip otyrmyz. Solardyń aldyńǵy leginde densaýlyq saqtaý salasy qyzmetkerleri tur. Iаǵnı, kórsetilgen normatıvter men sanattar boıynsha sala saqshylarynyń jalaqysy alǵashqy kezde birtindep, satylap 7 paıyzdan 28 paıyzǵa deıin ósirilmek. Osy arada eńbekaqy tóleý júıesiniń jańa úlgisi, onyń ádilettiligi men móldirligi jáne keń jarııalylyǵy bireýlerge negizsiz artyqshylyq nemese jetispeýshilik bermeıtini bárimizdiń oıymyzdan shyǵyp otyr.
Soǵan sáıkes, jalaqy birinshi kezekte medısına qyzmetkerleriniń laýazymyna, biliktiligi men kásibı sheberligine, atqaratyn qyzmetiniń kúrdeliligi men dárejesine qaraı esepteletini onyń artyqshylyǵyn aıǵaqtaı túsedi. Buǵan qosa koeffısıentterdiń arnaıy kestesin engizý isi qarastyrylǵany da eńbekaqy tóleý júıesiniń tolyqqandylyǵyn kórsetedi. Osyndaı ómirsheń ózgeris jaǵdaıynda tek jalaqy ósti dep jalań túsinsek, qatelesemiz. Sonymen birge, áriptesterimizdiń eńbeginiń mártebesi de kóterildi dep uǵynýymyz kerek. Halyqqa kórsetiletin medısınalyq qyzmettiń sapasy degen máseleni de osy qatarda qarastyrsaq qatelespeımiz. Eń bastysy, jańa úlgide buǵan deıin tájirıbede kezdeskenindeı, teńgermeshildik tórkini múlde ataýymen kezdespeıdi. Teńgermeshildik kelmeske ketipti. Kásibı biliktiligińdi kórsete aldyń ba, jalaqynyń 28 paıyzdy ósimine birden jol ashyq. Kórsete almadyń ba, onda kimge ókpe-renish bildirmeksiń?
Bir mezette jalaqynyń 28 paıyzdyq ósimi az nárse emes. Bul úshin 2016 jyldyń 1 qańtarynan respýblıkalyq bıýdjetten jáne jergilikti bıýdjetke maqsatty transfertter retinde bólinip otyrǵan qarajatttyń kólemi asa qomaqty. Elimizdegi densaýlyq saqtaý salasynyń qyzmetkerleri mundaı qamqorlyqqa ispen jaýap beredi dep esepteımin. Solardyń ortasynda bizder sekildi respýblıkanyń shalǵaı óńirlerinde qyzmet jasaıtyn densaýlyq saqshylary bar.
Qaıyrbaı ALTAEV,
Kaztalov aýdandyq ortalyqtandyrylǵan aýrýhanasynyń dırektory.
Batys Qazaqstan oblysy,
Kaztalov aýdany.