QARAǴANDY. 7 qańtar. Qaraǵandylyq «Shahter» fýtbol klýbynyń basshylyǵy men fýtbolshylary demalystan keıin alǵash ret bas qosyp, jınalys ótkizdi. Bul týraly klýb baspasóz qyzmetiniń aqparatyna silteme jasaǵan egemen.kz tilshisi habarlady.
«Shahter» bıylǵy jylǵy óziniń alǵashqy oqý-jattyǵý jıynyn Sátbaev qalasynda ótkizbekshi. Bul jıynǵa 2015 jyly komanda quramynda óner kórsetken fýtbolshylar jáne de Temirtaýdyń «Bolat AMT» komandasynyń qaqpashysy Aleksandr Rýshınas, alańdaǵy oıynshylar Evgenıı Azamatov, Aıdos Táttibaev, sondaı-aq, elimizdiń basqa óńirleriniń komandalarynda oınaǵan Maqsat Baıjanov («Atyraý»), Toqtar Jańǵylyshbaı, Igor Pıkalkın (ekeýi de «Astanadan»), Ilnýr Mangýtkın («Oqjetpes»), Evgenıı Gorıachıı («Jetisý») syndy aıaqdop sheberleri qatysady.
Eske salar bolsaq, «Shahterdiń» bas jattyqtyrýshysy áli taǵaıyndalǵan joq.
Qaırat Ábildınov.
Derek, sýret: egemen.kz.