ASTANA. 7 qańtar. Qatar memleketi Irandaǵy Saýd Arabııasynyń elshiligi men konsýldyǵyna jasalǵan shabýyldan keıin óz elshiligin keri qaıtaryp aldy. Bul týraly RIA «Novostı» aqparat agenttigine silteme jasaǵan egemen.kz tilshisi habarlady.
О́tken senbi kúni Saýd Arabııasynyń Ishki ister mınıstrligi 47 adamnyń ólim jazasyna kesilgendigi jóninde málimet bergen. Onyń ishinde sheılik baǵytyn ustanǵan din ýaǵyzdaýshysy Nımr án-Nımr de bar bolatyn. Osyǵan baılanysty Iranda adamdar jappaı narazylyq bildirip, Saýd Arabııasynyń Tegerandaǵy elshiligi pen Meshhedtegi konsýldyǵyna shabýyl jasady.
Saýd Arabııasynyń Syrtqy ister mınıstrliginiń basshysy Ádil ál-Jýbeır bolǵan oqıǵaǵa baılanysty Iran memleketimen dıplomatııalyq qarym-qatynastyń úzilgeni týraly málimdedi. Artynsha Bahreın, Sýdan men Djıbýtı elderi de osyny qaıtalady. Al Birikken Arab Ámirligi baılanysty eń tómengi deńgeıge deıin azaıtty. Qatar sııaqty Kýveıt te Tegerandaǵy óz elshiligin keri shaqyryp aldy.
Aıan Ábdýálı.
Derek: RIA «Novostı».
Sýret: wikimapia.org.