ASTANA. 7 qańtar. Qaraǵandy soty jasy kámeletke tolmaǵan qyzdy urlady degen aıyp taǵylǵan Andreı Býrlakovty aqtaý úkimin shyǵardy. Bul týraly NewTimes.kz deregine súıengen egemen.kz tilshisi habarlady.
Is materıaldarynda Býrlakovtyń sport keshenine qaraı bara jatqan Aleksandra Obrosovany sońynan ańdyp júrgeni aıtylady. Ol oraıy kelgen kezde qyzdy taksıge kúshtep otyrǵyzady. Olar mashınadan shyqqan boıda qyz dárihana ǵımaratyna qashyp kirip, jurttan kómek suraıdy. Jigit onyń sońynan júgirip kirgenimen, adamdar qyzdy qorǵap qalady.
Tergeý Býrlakovtyń buǵan deıin Temirtaýda ózge bireýdiń kýáligimen páter jaldap qoıǵanyn anyqtady.
Osy áreketi úshin Býrlakovtyń 9 jyl kolonııada otyrý jazasy kútip tur edi. Alaıda, sýdıa prosess barysynda aıyptalýshyny sózin kóbirek negizge aldy. Osylaısha jigittiń qyz óz erkimen mashınaǵa otyrdy degen sózine súıenip, ony aqtaǵan úkim shyǵardy.
Endi Obrosovanyń ata-anasy úkimge narazylyq bermekshi bolyp otyr.
«Meniń qyzymdy qorǵap qalǵan polısııa, prokýratýra qyzmetkerleri jáne birqatar kýálar budan qylmystyń izin kóredi de, nege sýdıa ony kórmeıdi?», deıdi qyzdyń ákesi Sergeı Obrosov.
Qazir prokýratýra aqtaý úkiminiń ádiletsiz jáne zańsyz ekenin kórsetip, joǵary ınstansııaǵa narazylyq daıyndap jatyr.
Talǵat Raıymbek.
Derek, foto: NewTimes.kz.