ASTANA. 11 qańtar. Qyzylordalyq Gúlbaný Jetkerbaeva 34 jasynda 10 balanyń anasy atanyp, Batyr ana atandy. Bul týraly nur.kz habarlaıdy.
Altyn qursaqty kelinshek sońǵy eki bóbegin jańa jyldyń alǵashqy kúninde bosanǵan. Ol alǵashqy balasyn 19 jasynda týǵan. Al qańtardyń alǵashqy kúninde egiz bosanǵan Gúlbaný osylaısha 34 jasynda on balanyń anasy atandy.
Egizderdiń esimi – Álı men Mádı. Kelinshek júktiliginiń 7-8 aptasynda-aq qursaǵynda egiz bala damyp kele jatqanyn bilgenderin aıtady. Sábılerdiń esimderin de qos atasy qoıǵan eken. Tórt kún dárigerlerdiń baqylaýynda bolǵan ana men qos náreste birer kún buryn perzenthanadan shyqty. Qyzyǵy sol, bazarly otbasy egizderdi alyp ketý úshin avtobýspen keldi.
Taıshyqovtar áýletiniń úlkeni 11-shi synypta oqıdy. Gúlbaný kishkentaılary ósip, bir jasqa tolyp, táı-táı basqannan keıin otaǵasy ekeýi jas balanyń ıisin ańsaıtyndaryn jasyrmaıdy. «Sol sezim, qushtarlyq árbir balamyz týǵan saıyn óse beredi. Balalarǵa degen mahabbatymyz arta tústi. Bala degen týǵan saıyn tátti bola beredi», – deıdi batyr ana. Sondaı-aq, Gúlbaný Jetkerbaeva eń baı ári baqytty janmyn deıdi.
Jalpy, Qyzylordada elimizdiń demografııasyna eleýli úles qosqan altyn qursaqty analardyń qatary sońǵy jyldary arta túsken. 2016- jyldyń alǵashqy aptasynda-aq oblys boıynsha 220 sábı dúnıege keldi. Búginde oblysta 40 myńnan astam kóp balaly ana bolsa, sonyń 25 myńy Batyr ana ataǵyn alǵan.
Talǵat Raıymbek.
Derek, sýret: nur.kz.