ASTANA. 11 qańtar. Týnıste sodyrlardyń terrorlyq shabýyldaryna baılanysty 570 qonaq úıdiń 270-i jabyldy. Bul týraly TASS aqparat agenttigine silteme jasaǵan egemen.kz tilshisi habarlady.
Týnıstiń Kásibı saıahatshylar qaýymdastyǵynyń jetekshisi Hýsema Ben Azýza jyl basynda jabylǵan qonaq úıler qatary kúrt kóbeıetinin aıtty. Bul is dástúr boıynsha, jyldyń alǵashqy toqsany týrındýstrııa úshin qolaısyz bolýymen baılanysty.
Sondaı-aq, birneshe márte jasalǵan terrorlyq shabýyldan keıin bul elge kelýshiler sany da quldyrady, sheteldik meımanhanalar jelisi de azaıdy. Ásirese Imperial Marhaba qonaq úıine tıesili RIU Hotels & Resorts atty ıspanııalyq qonaq úıler jelisi shyǵynǵa batty. О́tken jyldyń 26 maýsymynda jaǵalaýda bolǵan sodyrlar shabýylynan álemniń túkpir-túkpirinen jınalǵan 38 saıahatshy qaza tapty.
Jerbadaǵy Fransııanyń Djerba la Douce shıpajaıy da óz jumysyn toqtatty. Marmara fransýz jelisi Dar Djerba jáne Palm Beach Djerba qonaq úılerin japty.
Osyǵan baılanysty, Týnıske eýropalyq týrısterdiń qyzyǵýshylyǵy azaıdy. Demalys aımaǵynan Germanııa, Fransııa, Italııa, Ispanııa elderi bas tartty. Eldiń týrızm mınıstrliginiń basshysy Selm Ellýmı Rekıktiń aıtýynsha, 2015 jyly josparlanǵan saıahatshylardyń mıllıonǵa jýyǵy kelgen joq. «Birneshe ret bolǵan terrorlyq shabýyldan soń, Batystan kelýshiler sany 50% paıyzǵa kemidi», deıdi ol.
Ásirese, eldiń soltústik-shyǵysynda ornalasqan «Kap Bon» túbegi úlken shyǵynǵa ushyrady. Bul mańaıda 75 qonaq úı jumysyn toqtatýǵa májbúr bolǵan. Odan keıingi sheteldikter arasynda joǵary suranysqa ıe bolǵan «Jerba-Zarzıs» aımaǵynda 64 meımanhana qyzmetin toqtatty. Mundaı jaǵdaı eldiń barlyq óńirinde baıqalady.
Aıta keteıik, 2015 jyldyń 18 naýryz kúni sodyrlar el astanasyndaǵy Ulttyq murajaıǵa basa-kóktep kirip, týrısterge oq jaýdyrǵan. Saldarynan 20 adam qaza tapty. Araǵa úsh aı salyp, maýsymnyń 26-sy kúni Sýs shıpajaı qalasynda el tarıhynda bolmaǵan eń iri shabýyl jasaldy. Tártip saqshylary Riu Imperial Marhaba qonaq úıiniń 38 adamy mert bolǵanyn jáne de 40 saıahatshynyń túrli jaraqat alǵanyn anyqtady. Al 24 qarasha kúni Ishki ister mınıstrligi jáne týrızm ǵımaratynyń mańaıynda prezıdent kúzetshileri mingen avtobýs jaryldy. Saldarynan oqıǵa ornynda 13 adam qaza taýyp, 20-sy jaraqat aldy.
Aıan Ábdýálı.
Derek: TASS.
Sýret: reactor.inform.kz.