PETROPAVL. 11 qańtar. Birneshe jyldan beri ekologııalyq taza ónimder aınalysýmen aınalysatyn Andreı Streleı aıaq astynan jazyqty bolyp, 3 mıllıon teńge aıyppul tóleı jazdady. Bul týraly egemen.kz tilshisi habarlady.
Jeke kásipker Esil aýdanynda ekologııalyq taza kartop ósiredi, bıogýmýs óndiredi. Bıyl eki shaǵyn zaýyt salýdy josparlap otyr.
«Qyrsyqqanda qymyran irıdi» degen ras. Jambyl oblysynyń Shyǵanaq stansasy mańynda onyń júk tıelgen kóligin kólik ınspeksııasy toqtatyp, ólsheý kezinde 2 tonna 680 kılo salmaqtyń artyq shyqqanyn «tabady». Dereý akt toltyrylyp, 3 mıllıon teńge aıyppul salý arqyly jazalaýdy uıǵarady.
Alaıda, bul sheshimmen kelispegen Andreı kásipkerler palatasyna shaǵymdanady.
«Jedel top oqıǵa bolǵan jerge kelip, mán-jaıdy taldaý, saralaý barysynda bar-joǵy 200 kılo júktiń arttyq shyqqanyn anyqtady. Kásipker jaýapkershilikten bosatyldy», deıdi SQO kásipkerler quqyǵyn qorǵaý palatasynyń bólim bastyǵy Asqar Mahmetov.
Byltyr bul qurylymǵa 4 myń adam aryzdanyp, 300 mıllıon teńgeniń múliktik múddesi qorǵalǵan.
О́mir Esqalı.
Derek, sýret: egemen.kz